Periya Thirumadal — Chapter 17

தாமரைமேல்
 மின் இடையாள் நாயகனை விண் நகருள் பொன் மலையை *
 பொன்னி மணி கொழிக்கும் பூங் குடந்தைப் போர் விடையை *
 தென்னன் குறுங்குடியுள் செம் பவளக் குன்றினை *
 மன்னிய தண் சேறை வள்ளலை 62

மா மலர்மேல் அன்னம் துயிலும் அணி நீர் வயல் ஆலி *
 என்னுடைய இன் அமுதை எவ்வுள் பெரு மலையை *
 கன்னி மதிள் சூழ் கணமங்கைக் கற்பகத்தை *
 மின்னை, இரு சுடரை, வெள்ளறையுள் கல் அறைமேல்
 பொன்னை * மரதகத்தை புட்குழி எம் போர் ஏற்றை *
 மன்னும் அரங்கத்து எம் மா மணியை * 63

வல்லவாழ்ப்
 பின்னை மணாளனைப் பேரில் பிறப்பிலியை *
 தொல் நீர்க் கடல் கிடந்த தோளா மணிச் சுடரை *
 என் மனத்து மாலை இடவெந்தை ஈசனை *
 மன்னும் கடல்மல்லை மாயவனை * 64

வானவர் தம் சென்னி மணிச் சுடரைத் தண்கால் திறல் வலியை *
 தன்னைப் பிறர் அறியாத் தத்துவத்தை முத்தினை *
 அன்னத்தை மீனை அரியை அரு மறையை *
 முன் இவ் உலகு உண்ட மூர்த்தியை * 65

கோவலூர் மன்னும் இடைகழி எம் மாயவனை *
 பேய் அலறப் பின்னும் முலை உண்ட பிள்ளையை * 66

அள்ளல்வாய் அன்னம் இரை தேர் அழுந்தூர் எழும் சுடரை *
 தென் தில்லைச் சித்திரகூடத்து என் செல்வனை * 67

மின்னி மழை தவழும் வேங்கடத்து எம் வித்தகனை *
 மன்னனை மாலிருஞ்சோலை மணாளனை *
 கொல் நவிலும் ஆழிப் படையானை * 68

கோட்டியூர் அன்ன உருவின் அரியை * திருமெய்யத்து
 இன் அமுதவெள்ளத்தை இந்தளூர் அந்தணனை *
 மன்னு மதிள் கச்சி வேளுக்கை ஆள் அரியை *
 மன்னிய பாடகத்து எம் மைந்தனை * 69

வெஃகாவில்
 உன்னிய யோகத்து உறக்கத்தை * ஊரகத்துள்
 அன்னவனை அட்ட புயகரத்து எம்மான் ஏற்றை *
 என்னை மனம் கவர்ந்த ஈசனை *
 வானவர் தம் முன்னவனை 70

மூழிக்களத்து விளக்கினை *
 அன்னவனை ஆதனூர் ஆண்டு அளக்கும் ஐயனை *
 நென்னலை இன்றினை நாளையை * நீர்மலைமேல் முன்னவனை 71

மன்னும் மறை நான்கும் ஆனானை * புல்லாணித்
 தென்னன் தமிழை வடமொழியை *
 நாங்கூரில் மன்னு மணிமாடக்கோயில் மணாளனை *
 நல் நீர்த் தலைச்சங்க நாண்மதியை * நான் வணங்கும்
 கண்ணனைக் கண்ணபுரத்தானை * தென் நறையூர்
 மன்னு மணிமாடக்கோயில் மணாளனை * 72

கல் நவில் தோள் காளையைக் கண்டு ஆங்குக் கைதொழுது *
 என் நிலைமை எல்லாம் அறிவித்தால் எம் பெருமான் *
 தன் அருளும் ஆகமும் தாரானேல் * 73

தன்னை நான் மின் இடையார் சேரியிலும் வேதியர்கள் வாழ்விடத்தும் *
 தன் அடியார் முன்பும் தரணி முழுது ஆளும் *
 கொல் நவிலும் வேல் வேந்தர் கூட்டத்தும் நாட்டகத்தும் *
 தன் நிலைமை எல்லாம் அறிவிப்பன் * 74

தான் முன நாள்
 மின் இடை ஆய்ச்சியர் தம் சேரிக் களவின்கண் *
 துன்னு படல் திறந்து புக்கு * 75

தயிர் வெண்ணெய் தன் வயிறு ஆர விழுங்க *
 கொழுங் கயல் கண் மன்னு மடவோர்கள் பற்றி ஓர் வான் கயிற்றால் *
 பின்னும் உரலோடு கட்டுண்ட பெற்றிமையும் *
 அன்னது ஓர் பூதமாய் ஆயர் விழவின்கண் *
 துன்னு சகடத்தால் புக்க பெருஞ் சோற்றை *
 முன் இருந்து முற்றத் தான் துற்றிய தெற்றெனவும் *
 மன்னர் பெருஞ் சவையுள் வாழ் வேந்தர் தூதனாய் *
 தன்னை இகழ்ந்து உரைப்பத் தான் முன நாள் சென்றதுவும் *
 மன்னு பறை கறங்க மங்கையர் தம் கண் களிப்ப *
 கொல் நவிலும் கூத்தனாய்ப் பெயர்த்தும் குடம் ஆடி *
 என் இவன்? என்னப்படுகின்ற ஈடறவும் * 76

தென் இலங்கையாட்டி அரக்கர் குலப் பாவை *
 மன்னன் இராவணன் தன் நல் தங்கை * வாள் எயிற்றுத்
 துன்னு சுடு சினத்துச் சூர்ப்பணகா சோர்வு எய்தி *
 பொன் நிறம் கொண்டு புலர்ந்து எழுந்த காமத்தால் *
 தன்னை நயந்தாளைத் தான் முனிந்து மூக்கு அரிந்து *
 மன்னிய திண்ணெனவும் 77

வாய்த்த மலை போலும் *
 தன் நிகர் ஒன்று இல்லாத தாடகையை * மா முனிக்காத்
 தென் உலகம் ஏற்றுவித்த திண் திறலும் * 78

மற்று இவைதான்
 உன்னி உலவா உலகு அறிய ஊர்வன நான் * 79

முன்னி முளைத்து எழுந்து ஓங்கி ஒளி பரந்த *
 மன்னிய பூம் பெண்ணை மடல் 80