Irandam Thiruvandhadhi Pasurams 91–100

பின்னால் அரு நரகம் * சேராமல் பேதுறுவீர் *
 முன்னால் வணங்க முயல்மினோ ** பல் நூல்
 அளந்தானைக் * கார்க் கடல் சூழ் ஞாலத்தை * எல்லாம்
 அளந்தான் அவன் சேவடி 91

அடியால் முன் கஞ்சனைச் செற்று * அமரர் ஏத்தும்
 படியான் * கொடிமேல் புள் கொண்டான் ** நெடியான் தன்
 நாமமே * ஏத்துமின்கள் ஏத்தினால் * தாம் வேண்டும்
 காமமே காட்டும் கடிது 92

கடிது கொடு நரகம் * பிற்காலும் செய்கை *
 கொடிது என்று அது கூடா முன்னம் ** வடி சங்கம்
 கொண்டானைக் * கூந்தல் வாய் கீண்டானை * கொங்கை நஞ்சு
 உண்டானை ஏத்துமினோ உற்று 93

உற்று வணங்கித் தொழுமின் * உலகு ஏழும்
 முற்றும் விழுங்கும் முகில் வண்ணன் ** பற்றிப்
 பொருந்தாதான் மார்பு இடந்து * பூம் பாடகத்துள்
 இருந்தானை * ஏத்தும் என் நெஞ்சு 94

என் நெஞ்சம் மேயான் * என் சென்னியான் * தானவனை
 வல் நெஞ்சம் கீண்ட மணி வண்ணன் ** முன்னம் சேய்
 ஊழியான் * ஊழி பெயர்த்தான் * உலகு ஏத்தும்
 ஆழியான் அத்தியூரான் 95

அத்தியூரான் புள்ளை ஊர்வான் * அணி மணியின்
 துத்தி சேர் * நாகத்தின்மேல் துயில்வான் ** முத்தீ
 மறை ஆவான் * மா கடல் நஞ்சு உண்டான் தனக்கும் *
 இறை ஆவான் எங்கள் பிரான் 96

எங்கள் பெருமான் * இமையோர் தலைமகன்! நீ *
 செங்கண் நெடு மால் திருமார்பா! ** பொங்கு
 பட மூக்கின் ஆயிர வாய்ப் * பாம்பு அணைமேல் சேர்ந்தாய் *
 குடமூக்கில் கோயிலாக் கொண்டு 97

கொண்டு வளர்க்கக் * குழவியாய்த் தான் வளர்ந்தது *
 உண்டது உலகு ஏழும் உள் ஒடுங்க ** கொண்டு
 குடம் ஆடிக் * கோவலனாய் மேவி * என் நெஞ்சம்
 இடமாகக் கொண்ட இறை 98

இறை எம் பெருமான் ! அருள் என்று * இமையோர்
 முறை நின்று * மொய்ம் மலர்கள் தூவ ** அறை கழல
 சேவடியான் * செங்கண் நெடியான் * குறள் உருவாய்
 மாவடிவின் மண் கொண்டான் மால் 99

மாலே நெடியோனே! கண்ணனே ! * விண்ணவர்க்கு
 மேலா! * வியன் துழாய்க் கண்ணியனே ! ** மேலால்
 விளவின் காய் * கன்றினால் வீழ்த்தவனே! * என் தன்
 அளவு அன்றால் யானுடைய அன்பு 100