Irandam Thiruvandhadhi Pasurams 81–90

பகல் கண்டேன் * நாரணனைக் கண்டேன் * கனவில்
 மிகக் கண்டேன் * மீண்டு அவனை மெய்யே மிகக் கண்டேன் **
 ஊன் திகழும் நேமி * ஒளி திகழும் சேவடியான் *
 வான் திகழும் சோதி வடிவு 81

வடிக் கோல வாள் நெடுங் கண் * மா மலராள் * செவ்விப்
 படிக் கோலம் கண்டு அகலாள் பல்நாள் ** அடிக்கோலி
 ஞாலத்தாள் * பின்னும் நலம் புரிந்தது என்கொலோ? *
 கோலத்தால் இல்லை குறை 82

குறையாக வெஞ் சொற்கள் * கூறினேன் கூறி *
 மறை ஆங்கு என உரைத்த மாலை ** இறையேனும்
 ஈயும்கொல் ! என்றே * இருந்தேன் எனைப் பகலும் *
 மாயன்கண் சென்ற வரம் 83

வரம் கருதி தன்னை * வணங்காத வன்மை *
 உரம் கருதி மூர்க்கத்தவனை ** நரம் கலந்த
 சிங்கமாய்க் கீண்ட * திருவன் அடி இணையே *
 அம் கண் மா ஞாலத்து அமுது 84

அமுது என்றும் தேன் என்றும் * ஆழியான் என்றும் *
 அமுது அன்று கொண்டு உகந்தான் என்றும் ** அமுது அன்ன
 சொல் மாலை ஏத்தித் * தொழுதேன் சொலப்பட்ட *
 நல் மாலை ஏத்தி நவின்று 85

நவின்று உரைத்த நாவலர்கள் * நாள் மலர் கொண்டு * ஆங்கே
 பயின்றதனால் பெற்ற பயன் என்கொல்? ** பயின்றார் தம்
 மெய்த் தவத்தால் * காண்பு அரிய மேக மணி வண்ணனை * யான்
 எத் தவத்தால் காண்பன் கொல் இன்று? 86

இன்றா அறிகின்றேன் அல்லேன் * இரு நிலத்தைச்
 சென்று ஆங்கு அளந்த திருவடியை ** அன்று
 கருக்கோட்டியுள் கிடந்து * கைதொழுதேன் கண்டேன் *
 திருக்கோட்டி எந்தை திறம் 87

திறம்பிற்று இனி அறிந்தேன் * தென் அரங்கத்து எந்தை *
 திறம்பா வழிச் சென்றார்க்கு அல்லால் ** திறம்பாச்
 செடி நரகை நீக்கி * தாம் செல்வதன் முன் * வானோர்
 கடி நகர வாசல் கதவு 88

கதவி கதம் சிறந்த * கஞ்சனை முன் காய்ந்து *
 அதவி போர் யானை ஒசித்து ** பதவியாய்ப்
 பாணியால் நீர் ஏற்றுப் * பண்டு ஒருகால் மாவலியை *
 மாணியாய்க் கொண்டிலையே மண்? 89

மண்ணுலகம் ஆளேனே ? * வானவர்க்கும் வானவனாய் *
 விண்ணுலகம் தன் அகத்தும் மேவேனே? ** நண்ணித்
 திருமாலைச் * செங்கண் நெடியானை * எங்கள்
 பெருமானைக் கை தொழுத பின் 90