Periya Thirumadal — Chapter 5

இரு விசும்பில் மன்னும் மழை தவழும் வாள் நிலா நீள் மதி தோய் *
 மின்னின் ஒளி சேர் விசும்பு ஊரும் மாளிகைமேல் *
 மன்னும் மணி விளக்கை மாட்டி * மழை கண்ணார் 14

பன்னு விசித்திரமாப் பாப்படுத்த பள்ளிமேல் *
 துன்னிய சாலேகம் சூழ் கதவம் தாள் திறப்ப *
 அன்னம் உழக்க நெரிந்து
 உக்க வாள் நீலச் * சின்ன நறுந் தாது சூடி * ஓர் மந்தாரம் 15

துன்னு நறு மலரால் தோள் கொட்டி *
 கற்பகத்தின் மன்னு மலர்வாய் மணி வண்டு பின்தொடர *
 இன் இளம் பூந் தென்றல் புகுந்து ஈங்கு இள முலைமேல் *
 நல் நறும் சந்தனச் சேறு உலர்த்த * தாங்கு அரும் சீர் 16

மின் இடைமேல் கை வைத்து இருந்து ஏந்து இள முலைமேல் *
 பொன் அரும்பு ஆரம் புலம்ப * அகம் குழைந்து ஆங்கு 17

இன்ன உருவின் இமையாத் தடங் கண்ணார் *
 அன்னவர் தம் மான் நோக்கம் உண்டு ஆங்கு அணி முறுவல் *
 இன் அமுதம் மாந்தி இருப்பர் * இது அன்றே 19

அன்ன அறத்தின் பயன் ஆவது * ஒண் பொருளும்
 அன்ன திறத்ததே ஆதலால் * காமத்தின்
 மன்னும் வழிமுறையே நிற்றும் நாம் 20

மான் நோக்கின் *
 அன்ன நடையார் அலர் ஏச ஆடவர்மேல் *
 மன்னு மடல் ஊரார் என்பது ஓர் வாசகமும் *
 தென் உரையில் கேட்டு அறிவது உண்டு * அதனை யாம் தெளியோம்
 மன்னும் வட நெறியே வேண்டினோம் * 21

வேண்டாதார்
 தென்னன் பொதியில் செழுஞ் சந்தனக் குழம்பின் *
 அன்னது ஓர் தன்மை அறியாதார் * 22

ஆயன் வேய்
 இன் இசை ஓசைக்கு இரங்காதார் * மால் விடையின்
 மன்னும் மணி புலம்ப வாடாதார் * 23

பெண்ணைமேல்
 பின்னும் அவ் அன்றில் பெடை வாய்ச் சிறு குரலுக்கு *
உன்னி உடல் உருகி நையாதார் * 24

உம்பர்வாய்த்
 துன்னு மதி உகுத்த தூ நிலா நீள் நெருப்பில் *
 தம் உடலம் வேவத் தளராதார் * 25

காமவேள்
 மன்னும் சிலைவாய் மலர் வாளி கோத்து எய்ய *
பொன் நெடு வீதி புகாதார் * 26

தம் பூ அணைமேல்
 சின்ன மலர்க் குழலும் அல்குலும் மென் முலையும் *
 இன் இளவாடை தடவத் தாம் கண் துயிலும் *
 பொன் அனையார் பின்னும் திரு உறுக * 27