Periya Tirumozhi — Decade 9, Chapter 1

வங்க மா முந்நீர் வரி நிறப் பெரிய *
வாள் அரவின் அணை மேவி *
சங்கம் ஆர் அம் கைத் தட மலர் உந்தித் *
சாம மா மேனி என் தலைவன் **
அங்கம் ஆறு ஐந்து வேள்வி நால் வேதம் *
அருங் கலை பயின்று * எரி மூன்றும்
செங் கையால் வளர்க்கும் துளக்கம் இல் மனத்தோர் *
திருக்கண்ணங்குடியுள் நின்றானே 1

கவள மா கதத்த கரி உய்யப் * பொய்கைக்
கராம் கொளக் கலங்கி * உள் நினைந்து
துவள * மேல் வந்து தோன்றி வன் முதலை
துணிபடச் ** சுடு படை துரந்தோன்
குவளை நீள் முளரி குமுதம் ஒண் கழுநீர் *
கொய்ம் மலர் நெய்தல் ஒண் கழனி *
திவளும் மாளிகை சூழ் செழு மணிப் புரிசைத் *
திருக்கண்ணங்குடியுள் நின்றானே 2

வாதை வந்து அடர வானமும் நிலனும் *
மலைகளும் அலை கடல் குளிப்ப *
மீது கொண்டு உகளும் மீன் உரு ஆகி *
விரி புனல் வரி அகட்டு ஒளித்தோன் **
போது அலர் புன்னை மல்லிகை மௌவல் *
புது விரை மது மலர் அணைந்து *
சீத ஒண் தென்றல் திசைதொறும் கமழும் *
திருக்கண்ணங்குடியுள் நின்றானே 3

வென்றி சேர் திண்மை விலங்கல் மா மேனி *
வெள் எயிற்று ஒள் எரித் தறு கண் *
பன்றி ஆய் அன்று பார் மகள் பயலை *
தீர்த்தவன் பஞ்சவர் பாகன் **
ஒன்று அலா உருவத்து உலப்பு இல் பல் காலத்து *
உயர் கொடி ஒளி வளர் மதியம் *
சென்று சேர் சென்னிச் சிகர நல் மாடத் *
திருக்கண்ணங்குடியுள் நின்றானே 4

மன்னவன் பெரிய வேள்வியில் குறள் ஆய் *
மூவடி நீரொடும் கொண்டு *
பின்னும் ஏழ் உலகும் ஈர் அடி ஆக *
பெருந் திசை அடங்கிட நிமிர்ந்தோன் **
அன்னம் மென் கமலத்து அணி மலர்ப் பீடத்து *
அலை புனல் இலைக் குடை நீழல் *
செந்நெல் ஒண் கவரி அசைய வீற்றிருக்கும் *
திருக்கண்ணங்குடியுள் நின்றானே 5

மழுவினால் அவனி அரசை மூவெழுகால் *
மணி முடி பொடிபடுத்து * உதிரக்
குழுவு வார் புனலுள் குளித்து * வெம் கோபம்
தவிர்ந்தவன் குலை மலி கதலி **
குழுவும் வார் கமுகும் குரவும் நல் பலவும் *
குளிர் தரு சூத மாதவியும் *
செழுமை ஆர் பொழில்கள் தழுவும் நல் மாடத் *
திருக்கண்ணங்குடியுள் நின்றானே 6

வான் உளார் அவரை வலிமையால் நலியும் *
மறி கடல் இலங்கையார் கோனை *
பானு நேர் சரத்தால் பனங்கனிபோலப் *
பரு முடி உதிர வில் வளைத்தோன் **
கான் உலாம் மயிலின் கணங்கள் நின்று ஆடக் *
கண முகில் முரசம் நின்று அதிர *
தேன் உலா வரி வண்டு இன் இசை முரலும் *
திருக்கண்ணங்குடியுள் நின்றானே 7

அரவ நீள் கொடியோன் அவையுள் ஆசனத்தை *
அஞ்சிடாதே இட * அதற்குப்
பெரிய மா மேனி அண்டம் ஊடுருவப் *
பெருந் திசை அடங்கிட நிமிர்ந்தோன் **
வரையின் மா மணியும் மரதகத் திரளும் *
வயிரமும் வெதிர் உதிர் முத்தும் *
திரை கொணர்ந்து உந்தி வயல்தொறும் குவிக்கும் *
திருக்கண்ணங்குடியுள் நின்றானே 8

பன்னிய பாரம் பார் மகட்கு ஒழியப் *
பாரத மா பெரும் போரில் *
மன்னர்கள் மடிய மணி நெடுந் திண் தேர் *
மைத்துனற்கு உய்த்த மா மாயன் **
துன்னு மாதவியும் சுரபுனைப் பொழிலும் *
சூழ்ந்து எழு செண்பக மலர்வாய் *
தென்ன என்று அளிகள் முரன்று இசைபாடும் *
திருக்கண்ணங்குடியுள் நின்றானே 9

கலை உலா அல்குல் காரிகைதிறத்துக் *
கடல் பெரும் படையொடும் சென்று *
சிலையினால் இலங்கை தீ எழச் செற்ற *
திருக்கண்ணங்குடியுள் நின்றானை **
மலை குலாம் மாட மங்கையர் தலைவன் *
மான வேல் கலியன் வாய் ஒலிகள் *
உலவு சொல் மாலை ஒன்பதோடு ஒன்றும் *
வல்லவர்க்கு இல்லை நல்குரவே 10