Siriya Thirumadal Pasurams 1–10

கார் ஆர் வரைக் கொங்கை கண் ஆர் கடல் உடுக்கை *
 சீர் ஆர் சுடர்ச் சுட்டி செங்கலுழிப் பேர் ஆற்று *
 பேர் ஆர மார்வில் பெரு மா மழைக் கூந்தல் *
 நீர் ஆர வேலி நிலமங்கை என்னும் * இப்
 பாரோர் சொலப்பட்ட மூன்று அன்றே * 1

அம் மூன்றும்
ஆராயில் தானே அறம் பொருள் இன்பம் என்று *
ஆர் ஆர் இவற்றினிடை அதனை எய்துவார் *
 சீர் ஆர் இரு கலையும் எய்துவர் * 2

சிக்கென மற்று
 ஆரானும் உண்டு என்பார் என்பது தான் அதுவும் *
 ஓராமை அன்றே? உலகத்தார் சொல்லும் சொல் *
 ஓராமை ஆம் ஆறு அது உரைக்கேன் கேளாமே *
 கார் ஆர் புரவி ஏழ் பூண்ட தனி ஆழி *
 தேர் ஆர் நிறை கதிரோன் மண்டலத்தைக் கீண்டு புக்கு *
 ஆரா அமுதம் அங்கு எய்தி * 3

அதில் நின்றும்
 வாராது ஒழிவது ஒன்று உண்டே? * அது நிற்க
 ஏர் ஆர் முயல் விட்டுக் காக்கைப் பின் போவதே? *
 ஏர் ஆர் இளமுலையீர் என் தனக்கு உற்றது தான் * 4

கார் ஆர் குழல் எடுத்துக் கட்டி * கதிர் முலையை
 வார் ஆர வீக்கி மணி மேகலை திருத்தி *
 ஆர் ஆர் அயில் வேல் கண் அஞ்சனத்தின் நீறு அணிந்து *
 சீர் ஆர் செழும் பந்து கொண்டு அடியா நின்றேன் நான் *
 நீர் ஆர் கமலம் போல் செங்கண் மால் என்று ஒருவன் *
 பாரோர்கள் எல்லாம் மகிழ பறை கறங்க *
 சீர் ஆர் குடம் இரண்டு ஏந்தி * 5

செழுந் தெருவே
 ஆர் ஆர் எனச் சொல்லி ஆடும் அது கண்டு *
 ஏர் ஆர் இளமுலையார் என்னையரும் எல்லாரும் *
 வாராயோ என்றார்க்குச் சென்றேன் என் வல்வினையால் *
 கார் ஆர் மணி நிறமும் கை வளையும் காணேன் நான் *
 ஆரானும் சொல்லிற்றும் கொள்ளேன் * 6

அறிவு அழிந்து
 தீரா உடம்பொடு பேதுறுவேன் கண்டு இரங்கி *
 ஏர் ஆர் கிளிக் கிளவி எம் அனை தான் வந்து என்னைச் *
 சீர் ஆர் செழும் புழுதிக் காப்பிட்டு * 7

செங் குறிஞ்சித்
 தார் ஆர் நறு மாலைச் சாத்தற்கு * தான் பின்னும்
 நேராதன ஒன்று நேர்ந்தாள் * 8

அதனாலும்
 தீராது என் சிந்தை நோய் தீராது என் பேதுறவு *
 வாராது மாமை அது கண்டு மற்று ஆங்கே *
 ஆரானும் மூது அறியும் அம்மனைமார் சொல்லுவார் *
 பாரோர் சொலப்படும் கட்டுப்படுத்திரேல் *
 ஆரானும் மெய்ப்படுவன் என்றார் * 9

அது கேட்டுக்
 கார் ஆர் குழல் கொண்டைக் கட்டுவிச்சி கட்டேறி *
 சீர் ஆர் சுளகில் சில நெல் பிடித்து எறியா *
 வேரா விதிர்விதிரா மெய் சிலிரா கை மோவா *
 பேர் ஆயிரம் உடையான் என்றாள் * 10