Thiruvaymozhi — Decade 3, Chapter 6

செய்ய தாமரைக் கண்ணன் * ஆய் உலகு
 ஏழும் உண்ட அவன் கண்டீர் *
 வையம் வானம் மனிசர் தெய்வம் *
 மற்றும் மற்றும் மற்றும் முற்றும் ஆய் **
 செய்ய சூழ் சுடர் ஞானம் ஆய் * வெளிப்
 பட்டு இவை படைத்தான் * பின்னும்
 மொய் கொள் சோதியோடு ஆயினான் * ஒரு
 மூவர் ஆகிய மூர்த்தியே (1)

மூவர் ஆகிய மூர்த்தியை * முதல்
 மூவர்க்கும் முதல்வன் தன்னை *
 சாவம் உள்ளன நீக்குவானைத் *
 தடங் கடல் கிடந்தான் தன்னை **
 தேவ தேவனைத் தென் இலங்கை *
 எரி எழச் செற்ற வில்லியை *
 பாவ நாசனைப் பங்கயத் தடங்
 கண்ணனைப் * பரவுமினோ (2)

பரவி வானவர் ஏத்த நின்ற *
 பரமனைப் பரஞ்சோதியை *
 குரவை கோத்த குழகனை * மணி
 வண்ணனைக் குடக் கூத்தனை **
 அரவம் ஏறி அலை கடல் அமரும் *
 துயில்கொண்ட அண்ணலை *
 இரவும் நன் பகலும் விடாது * என்றும்
 ஏத்துதல் மனம் வைம்மினோ (3)

வைம்மின் நும் மனத்து என்று * யான்
 உரைக்கின்ற மாயவன் சீர்மையை *
 எம்மனோர்கள் உரைப்பது என்? * அது நிற்க
 நாள்தொறும் ** வானவர்
 தம்மை ஆளும் அவனும் * நான்முகனும்
 சடைமுடி அண்ணலும் *
 செம்மையால் அவன் பாத பங்கயம் *
 சிந்தித்து ஏத்தித் திரிவரே (4)

திரியும் காற்றோடு அகல் விசும்பு *
 திணிந்த மண் கிடந்த கடல் *
 எரியும் தீயோடு இரு சுடர் தெய்வம் *
 மற்றும் மற்றும் முற்றும் ஆய் **
 கரிய மேனியன் செய்ய தாமரைக் கண்ணன் *
 கண்ணன் விண்ணோர் இறை *
 சுரியும் பல் கருங் குஞ்சி * எங்கள்
 சுடர் முடி அண்ணல் தோற்றமே (5)

தோற்றக் கேடு அவை இல்லவன் உடையான் *
 அவன் ஒரு மூர்த்தியாய் *
 சீற்றத்தோடு அருள் பெற்றவன் அடிக்
 கீழ்ப் * புக நின்ற செங்கண்மால் **
 நாற்றத் தோற்றத் சுவை ஒலி * உறல்
 ஆகி நின்ற * எம் வானவர்
 ஏற்றையே அன்றி * மற்றொருவரை
 யான் இலேன் எழுமைக்குமே (6)

எழுமைக்கும் எனது ஆவிக்கு * இன்
 அமுதத்தினை எனது ஆர் உயிர் *
 கெழுமிய கதிர்ச் சோதியை * மணி
 வண்ணனைக் குடக் கூத்தனை **
 விழுமிய அமரர் முனிவர்
 விழுங்கும் * கன்னல் கனியினை *
 தொழுமின் தூய மனத்தர் ஆய் *
 இறையும் நில்லா துயரங்களே (7)

துயரமே தரு துன்ப இன்ப
 வினைகள் ஆய் * அவை அல்லன் ஆய் *
 உயர நின்றது ஓர் சோதி ஆய் * உலகு
 ஏழும் உண்டு உமிழ்ந்தான் தன்னை **
 அயர வாங்கும் நமன் தமர்க்கு * அரு
 நஞ்சினை அச்சுதன் தன்னை *
 தயரதற்கு மகன் தன்னை அன்றி *
 மற்று இலேன் தஞ்சமாகவே (8)

தஞ்சம் ஆகிய தந்தை தாயொடு *
 தானும் ஆய் அவை அல்லன் ஆய் *
 எஞ்சல் இல் அமரர் குலமுதல் *
 மூவர் தம்முள்ளும் ஆதியை **
 அஞ்சி நீர் உலகத்துள்ளீர்கள் *
 அவன் இவன் என்று கூழேன்மின் *
 நெஞ்சினால் நினைப்பான் எவன் * அவன்
 ஆகும் நீள் கடல் வண்ணனே (9)

கடல் வண்ணன் கண்ணன் * விண்ணவர்
 கருமாணிக்கம் எனது ஆர் உயிர் *
 பட அரவின் அணைக்கிடந்த *
 பரஞ்சுடர் பண்டு நூற்றுவர் **
 அட வரும் படை மங்க * ஐவர்கட்கு
 ஆகி வெம் சமத்து * அன்று தேர்
 கடவிய பெருமான் * கனை கழல்
 காண்பது என்றுகொல் கண்களே (10)

கண்கள் காண்டற்கு அரியன்
 ஆய்க் * கருத்துக்கு நன்றும் எளியன் ஆய் *
 மண் கொள் ஞாலத்து உயிர்க்கு எல்லாம்
 அருள் செய்யும் * வானவர் ஈசனை **
 பண் கொள் சோலை வழுதி நாடன் *
 குருகைக்கோன் சடகோபன் சொல் *
 பண் கொள் ஆயிரத்து இப் பத்தால் *
 பத்தர் ஆகக் கூடும் பயிலுமினே (11)