Thiruvaymozhi — Decade 6, Chapter 9

நீர் ஆய் நிலன் ஆய்த் * தீ ஆய் கால் ஆய் நெடு வான் ஆய்க் *
 சீர் ஆர் சுடர்கள் இரண்டு ஆய்ச் * சிவன் ஆய் அயன் ஆனாய் **
 கூர் ஆர் ஆழி வெண் சங்கு ஏந்திக் * கொடியேன்பால்
 வாராய் * ஒருநாள் மண்ணும் விண்ணும் மகிழவே (1)

மண்ணும் விண்ணும் மகிழக் * குறள் ஆய் வலம் காட்டி *
 மண்ணும் விண்ணும் கொண்ட * மாய அம்மானே **
 நண்ணி உனை நான் * கண்டு உகந்து கூத்தாட *
 நண்ணி ஒருநாள் * ஞாலத்தூடே நடவாயே (2)

ஞாலத்தூடே நடந்தும் நின்றும் * கிடந்து இருந்தும் *
 சாலப் பல நாள் * உகம்தோறு உயிர்கள் காப்பானே **
 கோலத் திரு மா மகளோடு * உன்னைக் கூடாதே *
 சாலப் பல நாள் * அடியேன் இன்னம் தளர்வேனோ? (3)

தளர்ந்தும் முறிந்தும் * சகட அசுரர் உடல் வேறா *
 பிளந்து வீயத் * திருக்கால் ஆண்ட பெருமானே **
 கிளர்ந்து பிரமன் சிவன் * இந்திரன் விண்ணவர் சூழ *
 விளங்க ஒருநாள் * காண வாராய் விண்மீதே (4)

விண்மீது இருப்பாய் மலைமேல் நிற்பாய் * கடல் சேர்ப்பாய் *
 மண்மீது உழல்வாய் * இவற்றுள் எங்கும் மறைந்து உறைவாய் **
 எண்மீது இயன்ற புற அண்டத்தாய் * எனது ஆவி *
 உள் மீது ஆடி * உருக் காட்டாதே ஒளிப்பாயோ? (5)

பாய் ஓர் அடி வைத்து அதன் கீழ்ப் * பரவை நிலம் எல்லாம்
 தாய் * ஓர் அடியால் * எல்லா உலகும் தடவந்த
 மாயோன் ** உன்னைக் காண்பான் * வருந்தி எனைநாளும் *
 தீயோடு உடன்சேர் மெழுகாய் * உலகில் திரிவேனோ? (6)

உலகில் திரியும் கரும கதி ஆய் * உலகம் ஆய் *
 உலகுக்கே ஓர் உயிரும் ஆனாய் * புற அண்டத்து **
 அலகில் பொலிந்த * திசை பத்து ஆய அருவேயோ *
 அலகில் பொலிந்த * அறிவிலேனுக்கு அருளாயே (7)

அறிவிலேனுக்கு அருளாய் * அறிவார் உயிர் ஆனாய் *
 வெறி கொள் சோதி மூர்த்தி * அடியேன் நெடுமாலே **
 கிறிசெய்து என்னைப் புறத்திட்டு * இன்னம் கெடுப்பாயோ *
 பிறிது ஒன்று அறியா அடியேன் * ஆவி திகைக்கவே? (8)

ஆவி திகைக்க * ஐவர் குமைக்கும் சிற்றின்பம் *
 பாவியேனைப் * பல நீ காட்டிப் படுப்பாயோ? **
 தாவி வையம் கொண்ட * தடம் தாமரை கட்கே *
 கூவிக் கொள்ளும் காலம் * இன்னம் குறுகாதோ? (9)

குறுகா நீளா * இறுதிகூடா எனை ஊழி *
 சிறுகா பெருகா * அளவு இல் இன்பம் சேர்ந்தாலும் **
 மறு கால் இன்றி மாயோன் * உனக்கே ஆளாகும் *
 சிறு காலத்தை உறுமோ * அந்தோ தெரியிலே? (10)

தெரிதல் நினைதல் * எண்ணல் ஆகாத் திருமாலுக்கு *
 உரிய தொண்டர் தொண்டர் * தொண்டன் சடகோபன் **
 தெரியச் சொன்ன * ஓர் ஆயிரத்துள் இப் பத்தும் *
 உரிய தொண்டர் ஆக்கும் * உலகம் உண்டாற்கே (11)