Irandam Thiruvandhadhi Pasurams 61–70

நின்றது ஓர் பாதம் * நிலம் புதைப்ப * நீண்ட தோள்
 சென்று அளந்தது என்பர் திசை எல்லாம் ** அன்று
 கரு மாணியாய் * இரந்த கள்வனே! * உன்னைப்
 பிரமாணித்தார் பெற்ற பேறு! 61

பேறு ஒன்றும் முன் அறியேன் * பெற்று அறியேன் பேதைமையால் *
 மாறு என்று சொல்லி வணங்கினேன் ** ஏறின்
 பெருத்தெருத்தம் கோடு ஒசிய * பெண் நசையின் பின் போய் *
 எருத்து இறுத்த நல் ஆயர் ஏறு 62

ஏறு ஏழும் * வென்று அடர்த்த எந்தை * எரி உருவத்து
 ஏறு ஏறி * பட்ட இடுசாபம் ** பாறு ஏறி
 உண்ட தலை வாய் நிறையக் * கோட்டு அம் கை ஒண் குருதி *
 கண்ட பொருள் சொல்லின் கதை 63

கதையும் பெரும் பொருளும் கண்ணா ! * நின் பேரே
 இதயம் * இருந்தவையே ஏத்தில் ** கதையும்
 திருமொழியாய் நின்ற * திருமாலே ! * உன்னைப்
 பரு மொழியால் காணப் பணி 64

பணிந்தேன் திருமேனி * பைங் கமலம் கையால் *
 அணிந்தேன் உன் சேவடிமேல் அன்பாய் ** துணிந்தேன்
 புரிந்து ஏத்தி * உன்னை புகலிடம் பார்த்து * ஆங்கே
 இருந்து ஏத்தி வாழும் இது 65

இது கண்டாய் நல் நெஞ்சே ! * இப் பிறவி ஆவது *
 இது கண்டாய் எல்லாம் நாம் உற்றது ** இது கண்டாய்
 நாரணன் பேர் ஓதி * நரகத்து அருகு அணையா *
 காரணமும் வல்லையேல் காண் 66

கண்டேன் திருமேனி * யான் கனவில் * ஆங்கு அவன் கைக்
 கண்டேன் * கனலும் சுடர் ஆழி ** கண்டேன்
 உறு நோய் வினை இரண்டும் * ஓட்டுவித்து * பின்னும்
 மறு நோய் செறுவான் வலி 67

வலி மிக்க வாள் எயிற்று * வாள் அவுணர் மாள *
 வலி மிக்க வாள் வரை மத்து ஆக * வலி மிக்க
 வாள் நாகம் சுற்றி * மறுகக் கடல் கடைந்தான் *
 கோள் நாகம் கொம்பு ஒசித்த கோ 68

கோ ஆகி * மா நிலம் காத்து * நம் கண் முகப்பே
 மா ஏகிச் செல்கின்ற மன்னவரும் ** பூ மேவும்
 செங் கமல நாபியான் * சேவடிக்கே ஏழ் பிறப்பும் *
 தண் கமலம் ஏய்ந்தார் தமர் 69

தமர் உள்ளம் தஞ்சை * தலை அரங்கம் தண்கால் *
 தமர் உள்ளும் தண் பொருப்பு வேலை ** தமர் உள்ளும்
 மாமல்லை கோவல் * மதிள் குடந்தை என்பரே *
 ஏ வல்ல எந்தைக்கு இடம் 70