Moonram Thiruvandhadhi Pasurams 11–20

நன்கு ஓதும் * நால் வேதத்து உள்ளான் * நறவு இரியும்
 பொங்கு ஓதருவிப் புனல் வண்ணன் ** சங்கு ஓதப்
 பாற்கடலான் * பாம்பு அணையின் மேலான் * பயின்று உரைப்பார்
 நூல் கடலான் நுண் அறிவினான் 11

அறிவு என்னும் தாள் கொளுவி * ஐம்புலனும் தம்மில் *
 செறிவு என்னும் திண் கதவம் செம்மி ** மறை என்றும்
 நன்கு ஓதி * நன்கு உணர்வார் காண்பரே * நாள் தோறும்
 பைங்கோத வண்ணன் படி 12

படி வட்டத் தாமரை * பண்டு உலகம் நீர் ஏற்று *
 அடி வட்டத்தால் அளப்ப நீண்ட முடி வட்டம் **
 ஆகாயம் ஊடறுத்து * அண்டம் போய் நீண்டதே *
 மா காயமாய் நின்ற மாற்கு 13

மால்பால் மனம் சுழிப்ப * மங்கையர் தோள் கைவிட்டு *
 நூற்பால் மனம் வைக்க நொய்விது ஆம் ** நாற்பால
 வேதத்தான் வேங்கடத்தான் * விண்ணோர் முடி தோயும் *
 பாதத்தான் பாதம் பணிந்து 14

பணிந்து உயர்ந்த பௌவப் * படு திரைகள் மோத *
 பணிந்த பண மணிகளாலே அணிந்து ** அங்கு
 அனந்தன் அணைக் * கிடக்கும் அம்மான் * அடியேன்
 மனம் தன் அணைக் கிடக்கும் வந்து 15

வந்து உதைத்த வெண் திரைகள் * செம் பவள வெண் முத்தம் *
 அந்தி விளக்கும் அணி விளக்காம் ** எந்தை
 ஒரு அல்லித் தாமரையாள் * ஒன்றிய சீர் மார்வன் *
 திருவல்லிக்கேணியான் சென்று 16

சென்ற நாள் செல்லாத * செங்கண் மால் எங்கள் மால் *
 என்ற நாள் எந் நாளும் நாள் ஆகும் ** என்றும்
 இறவாத எந்தை * இணை அடிக்கே ஆளாய் *
 மறவாது வாழ்த்துக என் வாய் 17

வாய் மொழிந்து வாமனனாய் * மாவலிபால் * மூவடி மண்
 நீ அளந்து கொண்ட நெடுமாலே ** தாவிய நின்
 எஞ்சா இணை அடிக்கே * ஏழ் பிறப்பும் ஆளாகி *
 அஞ்சாது இருக்க அருள் 18

அருளாது ஒழியுமே ? * ஆல் இலைமேல் * அன்று
 தெருளாத * பிள்ளையாய்ச் சேர்ந்தான் ** இருளாத
 சிந்தையராய் சேவடிக்கே * செம் மலர் தூய் கைதொழுது *
 முந்தையராய் நிற்பார்க்கு முன் 19

முன் உலகம் * உண்டு உமிழ்தாய்க்கு * அவ்வுலகம் ஈரடியால் *
பின் அளந்து கோடல் பெரிதொன்றே ? ** என்னே!
திருமாலே ! * செங்கண் நெடியானே ! * எங்கள்
பெருமானே ! நீ யிதனைப் பேசு 20