Moonram Thiruvandhadhi Pasurams 51–60

அவனே அரு வரையால் * ஆ நிரைகள் காத்தான் *
 அவனே அணி மருதம் சாய்த்தான் ** அவனே
 கலங்காப் பெரு நகரம் * காட்டுவான் கண்டீர் *
 இலங்காபுரம் எரித்தான் எய்து 51

எய்தான் மராமரம் * ஏழும் இராமனாய் *
 எய்தான் அம் மான் மறியை ஏந்திழைக்கு ஆய் ** எய்ததுவும்
 தென் இலங்கைக் கோன் வீழ * சென்று குறள் உரு ஆய் *
 முன் நிலம் கைக்கொண்டான் முயன்று 52

முயன்று தொழு நெஞ்சே! * மூரி நீர் வேலை *
 இயன்ற மரத்து ஆல் இலையின் மேலால் ** பயின்று அங்கு ஓர்
 மண் நலம் கொள் வெள்ளத்து * மாயக் குழவியாய் *
 தண் அலங்கல் மாலையான் தாள் 53

தாளால் சகடம் * உதைத்து பகடு உந்தி *
 கீளா மருது இடை போய் கேழல் ஆய் ** மீளாது
 மண் அகலம் கீண்டு * அங்கு ஓர் மாது உகந்த மார்வற்கு *
 பெண் அகலம் காதல் பெரிது 54

பெரிய வரை மார்பில் * பேர் ஆரம் பூண்டு *
 கரிய முகிலிடை மின் போல ** தெரியுங்கால்
 பாண் ஒடுங்க * வண்டு அறையும் பங்கயமே * மற்று அவன் தன்
 நீள் நெடுங் கண் காட்டும் நிறம் 55

நிறம் வெளிது செய்து * பசிது கரிது என்று *
 இறை உருவம் யாம் அறியோம் எண்ணில் ** நிறைவு உடைய
 நா மங்கை தானும் * நலம் புகழ் வல்லளே *
 பூ மங்கை கேள்வன்பொலிவு 56

பொலிந்து இருண்ட கார் வானில் * மின்னே போல் தோன்றி *
 மலிந்து திரு இருந்த மார்வன் ** பொலிந்து
 கருடன்மேல் கொண்ட * கரியான் கழலே *
 தெருள் தன்மேல் கண்டாய் தெளி 57

தெளிந்த சிலாதலத்தின் * மேல் இருந்த மந்தி *
 அளிந்த கடுவனையே நோக்கி ** விளங்கிய
 வெண் மதியம் * தா என்னும் வேங்கடமே * மேல் ஒரு நாள்
 மண் மதியில் கொண்டு உகந்தான் வாழ்வு 58

வாழும் வகை அறிந்தேன் * மை போல் நெடு வரைவாய் *
 தாழும் அருவி போல் தார் கிடப்ப ** சூழும்
 திரு மா மணி வண்ணன் * செங்கண் மால் * எங்கள்
 பெருமான் அடி சேரப் பெற்று 59

பெற்றம் பிணை மருதம் * பேய் முலை மாச் சகடம் *
 முற்றக் காத்து ஊடு போய் உண்டு உதைத்து ** கற்றுக்
 குணிலை * விளங் கனிக்குக் கொண்டு எறிந்தான் * வெற்றிப்
 பணிலம் வாய் வைத்து உகந்தான் பண்டு 60