Moonram Thiruvandhadhi Pasurams 61–70

பண்டு எல்லாம் வேங்கடம் * பாற்கடல் வைகுந்தம் *
 கொண்டு அங்கு உறைவார்க்கு கோயில் போல் ** வண்டு
 வளம் கிளரும் நீள் சோலை * வண் பூங் கடிகை *
 இளங் குமரன் தன் விண்ணகர் 61

விண்ணகரம் வெஃகா * விரி திரை நீர் வேங்கடம் *
 மண் நகரம் மா மாட வேளுக்கை ** மண்ணகத்த
 தென் குடந்தை * தேன் ஆர் திருவரங்கம் தென்கோட்டி *
 தன் குடங்கை நீர் ஏற்றான் தாழ்வு 62

தாழ் சடையும் நீள் முடியும் * ஒண் மழுவும் சக்கரமும் *
 சூழ் அரவும் பொன் நாணும் தோன்றுமால் ** சூழும்
 திரண்டு அருவி பாயும் * திருமலைமேல் எந்தைக்கு *
 இரண்டு உருவும் ஒன்றாய் இசைந்து 63

இசைந்த அரவமும் * வெற்பும் கடலும் *
 பசைந்து அங்கு அமுது படுப்ப ** அசைந்து
 கடைந்த வருத்தமோ? * கச்சி வெஃகாவில் *
 கிடந்து இருந்து நின்றதுவும் அங்கு? 64

அங்கற்கு இடர் இன்றி * அந்திப் பொழுதத்து *
 மங்க இரணியனது ஆகத்தை ** பொங்கி
 அரி உருவமாய்ப் பிளந்த * அம்மான் அவனே *
 கரி உருவம் கொம்பு ஒசித்தான் காய்ந்து 65

காய்ந்து இருளை மாற்றிக் * கதிர் இலகு மா மணிகள் *
 ஏய்ந்த பணக் கதிர்மேல் வெவ்வுயிர்ப்ப ** வாய்ந்த
 மது கைடவரும் * வயிறு உருகி மாண்டார் *
 அது கேடு அவர்க்கு இறுதி ஆங்கு 66

ஆங்கு மலரும் * குவியுமால் உந்திவாய் *
 ஓங்கு கமலத்தின் ஒண் போது ** ஆம் கைத்
 திகிரி சுடர் என்றும் * வெண் சங்கம் * வானில்
 பகரும் மதி என்றும் பார்த்து 67

பார்த்த கடுவன் * சுனை நீர் நிழல் கண்டு *
 பேர்த்து ஓர் கடுவன் எனப் பேர்ந்து ** கார்த்த
 களங் கனிக்குக் * கை நீட்டும் வேங்கடமே * மேல் நாள்
 விளங் கனிக்குக் கன்று எறிந்தான் வெற்பு 68

வெற்பு என்று * வேங்கடம் பாடும் * வியன் துழாய்
 கற்பு என்று சூடும் * கருங் குழல்மேல் ** மல் பொன்ற
 நீண்ட தோள் மால் கிடந்த * நீள் கடல் நீர் ஆடுவான் *
 பூண்ட நாள் எல்லாம் புகும் 69

புகு மதத்தால் * வாய் பூசிக் கீழ் தாழ்ந்து * அருவி
 உகு மதத்தால் * கால் கழுவிக் கையால் ** மிகு மதத் தேன்
 விண்ட மலர் கொண்டு * விறல் வேங்கடவனையே *
 கண்டு வணங்கும் களிறு 70