Mudhal Thiruvandhadhi Pasurams 61–70

உலகும் உலகு இறந்த ஊழியும் * ஒண் கேழ்
விலகு * கருங் கடலும் வெற்பும் ** உலகினில்
செந்தீயும் * மாருதமும் வானும் * திருமால் தன்
புந்தியில் ஆய புணர்ப்பு 61

புணர் மருதின் ஊடு போய்ப் * பூங் குருந்தம் சாய்த்து *
 மணம் மருவ மால் விடை ஏழ் செற்று ** கணம் வெருவ
 ஏழ் உலகும் தாயினவும் * எண் திசையும் போயினவும் *
 சூழ் அரவப் பொங்கு அணையான் தோள் 62

தோள் அவனை அல்லால் தொழா * என் செவி இரண்டும் *
 கேள் அவனது இன் மொழியே கேட்டிருக்கும் ** நா நாளும்
 கோள் நாகணையான் * குரை கழலே கூறுவதே *
 நாணாமை நள்ளேன் நயம் 63

நயவேன் பிறர் பொருளை * நள்ளேன் கீழாரோடு *
 உயவேன் உயர்ந்தவரோடு அல்லால் ** வியவேன்
 திருமாலை அல்லது * தெய்வம் என்று ஏத்தேன் *
 வரும் ஆறு என் நம் மேல் வினை? 64

வினையால் அடர்ப்படார் * வெம் நரகில் சேரார் *
 தினையேனும் தீக்கதிக்கண் செல்லார் ** நினைதற்கு
 அரியானை * சேயானை * ஆயிரம் பேர்ச் செங்கண்
 கரியானைக் கை தொழுதக்கால் 65

காலை எழுந்து * உலகம் கற்பனவும் * கற்று உணர்ந்த
 மேலைத் தலை மறையோர் வேட்பனவும் ** வேலைக்கண்
 ஓர் ஆழியான் அடியே * ஓதுவதும் ஓர்ப்பனவும் *
 பேர் ஆழி கொண்டான் பெயர் 66

பெயரும் கருங் கடலே * நோக்கும் ஆறு * ஒண் பூ
 உயரும் * கதிரவனே நோக்கும் ** உயிரும்
 தருமனையே நோக்கும் * ஒண் தாமரையாள் கேள்வன் *
 ஒருவனையே நோக்கும் உணர்வு 67

உணர்வார் ஆர் உன்பெருமை? * ஊழிதோறு ஊழி *
 உணர்வார் ஆர் உன் உருவம் தன்னை ** உணர்வார் ஆர்
 விண்ணகத்தாய் ! மண்ணகத்தாய்! * வேங்கடத்தாய்! * நால்வேதப்
 பண்ணகத்தாய் ! நீ கிடந்த பால்? 68

பாலன் தனது உருவாய் * ஏழ் உலகு உண்டு * ஆல் இலையின்
 மேல் அன்று நீ வளர்ந்த மெய் என்பர் ** ஆல் அன்று
 வேலை நீர் உள்ளதோ? * விண்ணதோ? மண்ணதோ? *
 சோலை சூழ் குன்று எடுத்தாய் ! சொல்லு 69

சொல்லும் தனையும் தொழுமின் விழும் உடம்பு *
 செல்லும் தனையும் திருமாலை ** நல் இதழ்த்
 தாமத்தால் வேள்வியால் * தந்திரத்தால் மந்திரத்தால் *
 நாமத்தால் ஏத்துதிரேல் நன்று 70