Naanmugan Thiruvandhadhi Pasurams 11–20

வாழ்த்துக வாய் * காண்க கண் கேட்க செவி * மகுடம்
 தாழ்த்தி * வணங்குமின்கள் தண் மலரால் ** சூழ்த்த
 துழாய் மன்னு நீள் முடி * என் தொல்லை மால் தன்னை *
 வழா வண் கை கூப்பி மதித்து 11

மதித்தாய் போய் நான்கின் * மதியார் போய் வீழ *
 மதித்தாய் மதி கோள் விடுத்தாய் ** மதித்தாய்
 மடுக் கிடந்த * மா முதலை கோள் விடுப்பான் * ஆழி
 விடற்கு இரண்டும் போய் இரண்டின் வீடு 12

வீடு ஆக்கும் * பெற்றி அறியாது * மெய் வருத்திக்
 கூடு ஆக்கி * நின்று உண்டு கொண்டு உழல்வீர் ** வீடு ஆக்கும்
 மெய்ப்பொருள் தான் * வேத முதற்பொருள் தான் * விண்ணவர்க்கு
 நற்பொருள் தான் நாராயணன் 13

நாராயணன் என்னை ஆளி * நரகத்துச்
 சேராமல் * காக்கும் திருமால் ** தன் பேரான
 பேசப் பெறாத * பிணச் சமயர் பேசக் கேட்டு *
 ஆசைப்பட்டு ஆழ்வார் பலர் 14

பல தேவர் ஏத்தப் * படி கடந்தான் பாதம் *
 மலர் ஏற இட்டு இறைஞ்சி வாழ்த்த வலர் ஆகில் **
 மார்க்கண்டன் கண்ட வகையே * வரும் கண்டீர் *
 நீர்க்கண்டன் கண்ட நிலை 15

நிலைமன்னும் என் நெஞ்சம் * அந்நான்று * தேவர்
 தலை மன்னர் * தாமே மாற்றாக ** பல மன்னர்
 போர் மாள * வெம் கதிரோன்மாயப் பொழில் மறைய *
 தேர் ஆழியால் மறைத்தாரால் 16

ஆல நிழற்கீழ் * அற நெறியை * நால்வர்க்கு
 மேலை யுகத்து உரைத்தான் * மெய்த் தவத்தோன் ** ஞாலம்
 அளந்தானை * ஆழிக் கிடந்தானை * ஆல்மேல்
 வளர்ந்தானைத் தான் வணங்குமாறு 17

மாறு ஆய தானவனை * வள் உகிரால் * மார்வு இரண்டு
 கூறாகக் * கீறிய கோளரியை ** வேறாக
 ஏத்தி யிருப்பாரை * வெல்லுமே * மற்று அவரைச்
 சார்த்தியிருப்பார் தவம் 18

தவம் செய்து * நான்முகனால் பெற்ற வரத்தை *
 அவம் செய்த ஆழியாய் அன்றே ** உவந்து எம்மைக்
 காப்பாய் நீ * காப்பதனை ஆவாய் நீ * வைகுந்தம்
 ஈப்பாயும் எவ் உயிர்க்கும் நீ 19

நீயே உலகு எல்லாம் * நின் அருளே நிற்பனவும் *
 நீயே தவத் தேவ தேவனும் ** நீயே
 எரி சுடரும் மால் வரையும் * எண் திசையும் * அண்டத்து
 இரு சுடரும் ஆய இவை 20