Naanmugan Thiruvandhadhi Pasurams 71–80

சேயன் அணியன் * சிறியன் மிகப் பெரியன் *
 ஆயன் துவரைக் கோனாய் நின்ற மாயன் ** அன்று
 ஓதிய * வாக்கு அதனைக் கல்லார் * உலகத்தில்
 ஏதிலர் ஆம் மெய்ஞ் ஞானம் இல் (71)

இல்லறம் இல்லேல் * துறவறம் இல் என்னும் *
 சொல் அறம் அல்லனவும் சொல் அல்ல ** நல்லறம்
 ஆவனவும் * நால் வேத மாத் தவமும் * நாரணனே
 ஆவது ஈது அன்று என்பார் ஆர்? (72)

ஆரே அறிவார்? * அனைத்து உலகும் உண்டு உமிழ்ந்த *
 பேர் ஆழியான் தன் பெருமையை ** கார் செறிந்த
 கண்டத்தான் * எண் கண்ணான் காணான் * அவன் வைத்த
 பண்டைத் தானத்தின் பதி 73

பதிப் பகைஞர்க்கு ஆற்றாது * பாய் திரை நீர்ப் பாழி *
 மதித்து அடைந்த வாள் அரவம் தன்னை ** மதித்து அவன் தன்
 வல் ஆகத்து ஏற்றிய * மா மேனி மாயவனை *
 அல்லாது ஒன்று ஏத்தாது என் நா 74

நாக் கொண்டு மானிடம் பாடேன் நலம் ஆகத்
 தீக் கொண்ட * செஞ்சடையான் சென்று ** என்றும் பூக் கொண்டு
 வல்லவாறு * ஏத்த மகிழாத * வைகுந்தச்
 செல்வனார் * சேவடிமேல் பாட்டு 75

பாட்டும் முறையும் * படு கதையும் பல் பொருளும் *
 ஈட்டிய தீயும் இரு விசும்பும் ** கேட்ட
 மனுவும் * சுருதி மறை நான்கும் * மாயன்
 தன மாயையில் பட்ட தற்பு (76)

தற்பு என்னைத் * தான் அறியானேலும் * தடங் கடலைக்
 கல் கொண்டு தூர்த்த கடல் வண்ணன் ** என் கொண்ட
 வெவ்வினையும் நீங்க * விலங்கா மனம் வைத்தான் *
 எவ் வினையும் மாயுமால் கண்டு 77

கண்டு வணங்கினார்க்கு * என்னாம்கொல் ? * காமன் உடல்
 கொண்ட * தவத்தாற்கு உமை உணர்த்த ** வண்டு அலம்பும்
 தார் அலங்கல் நீள் முடியான் * தன் பெயரே கேட்டிருந்து * அங்கு
 ஆர் அலங்கல் ஆனமையால் ஆய்ந்து 78

ஆய்ந்துகொண்டு * ஆதிப் பெருமானை * அன்பினால்
 வாய்ந்த * மனத்து இருத்த வல்லார்கள் ** ஏய்ந்த தம்
 மெய் குந்தம் ஆக * விரும்புவரே * தாமும் தம்
 வைகுந்தம் காண்பார் விரைந்து 79

விரைந்து அடைமின் மேல் ஒரு நாள் * வெள்ளம் பரக்க *
 கரந்து உலகம் காத்து அளித்த கண்ணன் ** பரந்து உலகம் *
 பாடின ஆடின கேட்டு * படு நரகம்
 வீடின வாசல் கதவு 80