Naanmugan Thiruvandhadhi Pasurams 81–90

கதவு மனம் என்றும் * காணலாம் என்றும் *
 குதையும் வினை ஆவி தீர்ந்தேன் ** விதை ஆக
 நல் தமிழை வித்தி * என் உள்ளத்தை நீ விளைத்தாய் *
 கற்ற மொழி ஆகிக் கலந்து 81

கலந்தான் என் உள்ளத்துக் * காம வேள் தாதை *
 நலம் தானும் ஈது ஒப்பது உண்டே? ** அலர்ந்தலர்கள்
 இட்டு ஏத்தும் * ஈசனும் நான்முகனும் * என்றிவர்கள்
 விட்டு ஏத்த மாட்டாத வேந்து 82

வேந்தர் ஆய் விண்ணவர் ஆய் * விண் ஆகி தண்ணளி ஆய் *
 மாந்தர் ஆய் மாது ஆய் மற்று எல்லாம் ஆய் ** சார்ந்தவர்க்குத்
 தன் ஆனால் தான் நேமியான் * மால் வண்ணன் தான் கொடுக்கும் *
 பின்னால் தான் செய்யும் பிதிர் 83

பிதிரும் மனம் இலேன் * பிஞ்ஞகன் தன்னோடு
 எதிர்வன் * அவன் எனக்கு நேரான் ** அதிரும்
 கழல் கால மன்னனையே * கண்ணனையே * நாளும்
 தொழக் காதல் பூண்டேன் தொழில் (84)

தொழில் எனக்குத் * தொல்லை மால் தன் நாமம் ஏத்த *
 பொழுது எனக்கு மற்று அதுவே போதும் ** கழி சினத்த
 வல்லாளன் * வானரக் கோன் வாலி மதன் அழித்த *
 வில்லாளன் நெஞ்சத்து உளன் 85

உளன் கண்டாய் நல் நெஞ்சே! * உத்தமன் என்றும்
 உளன் கண்டாய் * உள்ளுவார் உள்ளத்து உளன் கண்டாய் **
 தன் ஒப்பான் தான் ஆய் * உளன் காண் தமியேற்கு *
 என் ஒப்பார்க்கு ஈசன் இமை 86

இமயப் பெரு மலை போல் * இந்திரனார்க்கு இட்ட *
 சமய விருந்து உண்டு ஆர் காப்பார்? ** சமயங்கள்
 கண்டான் அவை காப்பான் * கார்க்கண்டன் நான்முகனோடு *
 உண்டான் உலகோடு உயிர் 87

உயிர் கொண்டு உடல் ஒழிய * ஓடும் போது ஓடி *
 அயர்வு என்ற தீர்ப்பான் பேர் பாடி ** செயல் தீரச்
 சிந்தித்து * வாழ்வாரே வாழ்வார் * சிறு சமயப்
 பந்தனையார் வாழ்வேல் பழுது (88)

பழுது ஆகாது ஒன்று அறிந்தேன் * பாற்கடலான் பாதம் *
 வழுவாவகை நினைந்து வைகல் தொழுவாரை **
 கண்டு இறைஞ்சி வாழ்வார் * கலந்த வினை கெடுத்து *
 விண் திறந்து வீற்றிருப்பார் மிக்கு 89

வீற்றிருந்து * விண் ஆள வேண்டுவார் * வேங்கடத்தான்
 பால் திருந்த வைத்தாரே பல் மலர்கள் ** மேல் திருந்த
 வாழ்வார் * வரும் மதி பார்த்து அன்பினராய் * மற்று அவற்கே
 தாழ்வாய் இருப்பார் தமர் 90