Periya Thiruvandhadhi Pasurams 21–30

சென்று அங்கு வெம் நரகில் * சேராமல் காப்பதற்கு *
 இன்று இங்கு என் நெஞ்சால் இடுக்குண்ட ** அன்று அங்குப்
 பார் உருவும் * பார் வளைத்த நீர் உருவும் * கண் புதைய
 கார் உருவன் தான் நிமிர்த்த கால் 21

காலே பொதத் திரிந்து * கத்துவராம் இனநாள் *
 மாலார் குடிபுகுந்தார் என் மனத்தே ** மேலால்
 தருக்கும் இடம்பாட்டினொடும் * வல்வினையார் தாம் * வீற்று
 இருக்கும் இடம் காணாது இளைத்து 22

இளைப்பாய் இளையாப்பாய் * நெஞ்சமே சொன்னேன் *
 இளைக்க நமன் தமர்கள் பற்றி இளைப்பு எய்த **
 நாய் தந்து மோதாமல் * நல்குவான் நல்காப்பான் *
 தாய் தந்தை எவ் உயிர்க்கும் தான் 23

தானே தனித் தோன்றல் * தன் அளப்பு ஒன்று இல்லாதான் *
 தானே பிறர்கட்கும் தன் தோன்றல் ** தானே
 இளைக்கில் பார் கீழ் மேல் ஆம் * மீண்டு அமைப்பான் ஆனால் *
 அளக்கிற்பார் பாரின்மேல் ஆர்? 24

ஆரானும் ஆதானும் செய்ய * அகலிடத்தை
 ஆராய்ந்து * அது திருத்தல் ஆவதே? ** சீர் ஆர்
 மனத்தலை * வன் துன்பத்தை மாற்றினேன் * வானோர்
 இனத் தலைவன் கண்ணனால் யான் 25

யானும் என் நெஞ்சும் இசைந்தொழிந்தோம் * வல்வினையைக்
 கானும் மலையும் புகக் கடிவான் ** தான் ஓர்
 இருள் அன்ன மா மேனி * எம் இறையார் தந்த *
 அருள் என்னும் தண்டால் அடித்து 26

அடியால் * படி கடந்த முத்தோ? * அது அன்றேல்
 முடியால் * விசும்பு அளந்த முத்தோ? ** நெடியாய்
 செறி கழல் கொள் தாள் நிமிர்த்துச் * சென்று உலகம் எல்லாம் *
 அறிகிலமால் நீ அளந்த அன்று 27

அன்றே நம் கண் காணும் * ஆழியான் கார் உருவம் *
 இன்றே நாம் காணாது இருப்பதுவும் ** என்றேனும்
 கட்கண்ணால் * காணாத அவ் உருவை * நெஞ்சு என்னும்
 உட்கண்ணேல் காணும் உணர்ந்து 28

உணர ஒருவர்க்கு * எளியேனே செவ்வே *
 இணரும் துழாய் அலங்கல் எந்தை? ** உணரத்
 தனக்கு எளியர் * எவ் அளவர் அவ் அளவன் ஆனால் *
 எனக்கு எளியன் எம் பெருமான் இங்கு 29

இங்கு இல்லை பண்டுபோல் * வீற்றிருத்தல் * என்னுடைய
 செங்கண் மால் சீர்க்கும் சிறிது உள்ளம் ** அங்கே
 மடி அடக்கி நிற்பதனில் * வல்வினையார் தாம் * ஈண்டு
 அடி எடுப்பது அன்றோ அழகு? 30