Periya Thiruvandhadhi Pasurams 71–80

இனி நின்று நின் பெருமை * யான் உரைப்பது என்னே? *
 தனி நின்ற சார்வு இலா மூர்த்தி ** பனி நீர்
 அகத்து உலவு * செஞ்சடையான் ஆகத்தான் * நான்கு
 முகத்தான் நின் உந்தி முதல் 71

முதல் ஆம் திரு உருவம் மூன்று என்பர் * ஒன்றே
 முதல் ஆகும் * மூன்றுக்கும் என்பர் ** முதல்வா
 நிகர் இலகு கார் உருவா * நின் அகத்தது அன்றே *
 புகர் இலகு தாமரையின் பூ? 72

பூவையும் காயாவும் * நீலமும் பூக்கின்ற *
 காவி மலர் என்றும் காண்தோறும் ** பாவியேன்
 மெல் ஆவி * மெய் மிகவே பூரிக்கும் * அவ்வவை
 எல்லாம் பிரான் உருவே என்று 73

என்றும் ஒருநாள் * ஒழியாமை யான் இரந்தால் *
 ஒன்றும் இரங்கார் உருக் காட்டார் ** குன்று
 குடை ஆக * ஆ காத்த கோவலனார் * நெஞ்சே
 புடை தான் பெரிதே புவி 74

புவியும் இரு விசும்பும் நின் அகத்த * நீ என்
 செவியின் வழி புகுந்து * என் உள்ளாய் ** அவிவு இன்றி
 யான் பெரியன் நீ பெரியை * என்பதனை யார் அறிவார்? *
 ஊன் பருகு நேமியாய் உள்ளு 75

உள்ளிலும் உள்ளம் தடிக்கும் * வினைப் படலம் *
 விள்ள விழித்து உன்னை மெய் உற்றால் ** உள்ள
 உலகு அளவும் யானும் * உளன் ஆவன் என்கொலோ? *
 உலகு அளந்த மூர்த்தி உரை 76

உரைக்கில் ஓர் சுற்றத்தார் * உற்றார் என்று ஆரே? *
 இரைக்கும் கடல் கிடந்த எந்தாய் ** உரைப்பு எல்லாம்
 நின் அன்றி * மற்று இலேன் கண்டாய் * எனது உயிர்க்கு ஓர்
 சொல் நன்றி ஆகும் துணை 77

துணை நாள் பெருங் கிளையும் * தொல் குலமும் * சுற்றத்து
 இணை நாளும் இன்பு உடைத்தாமேலும் ** கணை நாணில்
 ஓவாத் தொழில் சார்ங்கன் * தொல் சீரை நல் நெஞ்சே *
 ஓவாத ஊணாக உண் 78

உள் நாட்டுத் தேசு அன்றே? * ஊழ்வினையை அஞ்சுமே? *
 விண் நாட்டை ஒன்று ஆக மெச்சுமே? ** மண் நாட்டில்
 ஆர் ஆகி * எவ் இழிவிற்று ஆனாலும் * ஆழி அங்கைப்
 பேர் ஆயற்கு ஆள் ஆம் பிறப்பு 79

பிறப்பு இறப்பு மூப்புப் * பிணி துறந்து * பின்னும்
 இறக்கவும் இன்பு உடைத்தாமேலும் ** மறப்பு எல்லாம்
 ஏதமே * என்று அல்லால் எண்ணுவனே * மண் அளந்தான்
 பாதமே ஏத்தாப் பகல்? 80