Periya Tirumozhi — Decade 1, Chapter 10

கண் ஆர் கடல் சூழ் * இலங்கைக்கு இறைவன் தன் *
 திண் ஆகம் பிளக்கச் * சரம் செல உய்த்தாய் **
 விண்ணோர் தொழும் * வேங்கட மா மலை மேய *
 அண்ணா அடியேன் * இடரைக் களையாயே 1

இலங்கைப் பதிக்கு * அன்று இறை ஆய * அரக்கர்
குலம் கெட்டு அவர் மாளக் * கொடிப் புள் திரித்தாய் **
விலங்கல் குடுமித் * திருவேங்கடம் மேய *
அலங்கல் துளப முடியாய் * அருளாயே 2

நீர் ஆர் கடலும் * நிலனும் முழுது உண்டு *
 ஏர் ஆலம் இளந் தளிர்மேல் * துயில் எந்தாய் **
 சீர் ஆர் * திருவேங்கட மா மலை மேய *
 ஆரா அமுதே * அடியேற்கு அருளாயே 3

உண்டாய் உறிமேல் * நறு நெய் அமுது ஆக *
 கொண்டாய் குறள் ஆய் * நிலம் ஈர் அடியாலே **
 விண் தோய் சிகரத் * திருவேங்கடம் மேய *
 அண்டா அடியேனுக்கு * அருள்புரியாயே 4

தூண் ஆய் அதனூடு * அரியாய் வந்து தோன்றி *
 பேணா அவுணன் உடலம் * பிளந்திட்டாய் **
 சேண் ஆர் * திருவேங்கட மா மலை மேய *
 கோள் நாகணையாய் * குறிக்கொள் எனை நீயே 5

மன்னா * இம் மனிசப் பிறவியை நீக்கி *
 தன் ஆக்கித் * தன் இன் அருள் செய்யும் தலைவன் **
 மின் ஆர் முகில் சேர் * திருவேங்கடம் மேய *
 என் ஆனை என் அப்பன் * என் நெஞ்சில் உளானே 6

மான் ஏய் மட நோக்கி * திறத்து எதிர் வந்த *
 ஆன் ஏழ் விடை செற்ற * அணி வரைத் தோளா **
 தேனே * திருவேங்கட மா மலை மேய *
 கோனே என் மனம் * குடிகொண்டு இருந்தாயே 7

சேயன் அணியன் * என சிந்தையுள் நின்ற
 மாயன் * மணி வாள் ஒளி * வெண் தரளங்கள் **
 வேய் விண்டு உதிர் * வேங்கட மா மலை மேய *
 ஆயன் அடி அல்லது * மற்று அறியேனே 8

வந்தாய் என் மனம் புகுந்தாய் * மன்னி நின்றாய் *
 நந்தாத கொழுஞ் சுடரே * எங்கள் நம்பீ **
 சிந்தாமணியே * திருவேங்கடம் மேய *
 எந்தாய்! இனி யான் உன்னை * என்றும் விடேனே 9

வில்லார் மலி * வேங்கட மா மலை மேய *
 மல் ஆர் திரள் தோள் * மணி வண்ணன் அம்மானை **
 கல் ஆர் திரள் தோள் * கலியன் சொன்ன மாலை *
 வல்லார் அவர் * வானவர் ஆகுவர் தாமே 10