Periya Tirumozhi — Decade 1, Chapter 9

தாயே தந்தை என்றும் * தாரமே கிளை மக்கள் என்றும் *
 நோயே பட்டொழிந்தேன் * நுன்னைக் காண்பது ஓர் ஆசையினால் **
 வேய் ஏய் பூம் பொழில் சூழ் * விரை ஆர் திருவேங்கடவா! *
 நாயேன் வந்து அடைந்தேன் * நல்கி ஆள் என்னைக் கொண்டருளே 1

மான் ஏய் கண் மடவார் * மயக்கில் பட்டு * மா நிலத்து
 நானே நானாவித * நரகம் புகும் பாவம் செய்தேன் **
 தேன் ஏய் பூம் பொழில் சூழ் * திருவேங்கட மா மலை * என்
 ஆனாய்! வந்து அடைந்தேன் * அடியேனை ஆட் கொண்டருளே 2

கொன்றேன் பல் உயிரைக் * குறிக்கோள் ஒன்று இலாமையினால் *
 என்றேனும் இரந்தார்க்கு * இனிது ஆக உரைத்து அறியேன் **
 குன்று ஏய் மேகம் அதிர் * குளிர் மா மலை வேங்கடவா *
 அன்றே வந்து அடைந்தேன் * அடியேனை ஆட் கொண்டருளே 3

குலம் தான் எத்தனையும் * பிறந்தே இறந்து எய்த்தொழிந்தேன் *
 நலம் தான் ஒன்றும் இலேன் * நல்லது ஓர் அறம் செய்தும் இலேன் **
 நிலம் தோய் நீள் முகில் சேர் * நெறி ஆர் திருவேங்கடவா! *
 அலந்தேன் வந்து அடைந்தேன் * அடியேனை ஆட் கொண்டருளே 4

எப் பாவம் பலவும் * இவையே செய்து இளைத்தொழிந்தேன் *
துப்பா நின் அடியே * தொடர்ந்து ஏத்தவும் கிற்கின்றிலேன் **
செப்பு ஆர் திண் வரை சூழ் * திருவேங்கட மா மலை * என்
அப்பா! வந்து அடைந்தேன் * அடியேனை ஆட் கொண்டருளே 5

மண் ஆய் நீர் எரி கால் * மஞ்சு உலாவும் ஆகாசமும் ஆம் *
 புண் ஆர் ஆக்கை தன்னுள் * புலம்பித் தளர்ந்து எய்த்தொழிந்தேன் **
 விண் ஆர் நீள் சிகர * விரைஆர் திருவேங்கடவா! *
 அண்ணா வந்து அடைந்தேன் * அடியேனை ஆட் கொண்டருளே 6

தெரியேன் பாலகனாய்ப் * பல தீமைகள் செய்துமிட்டேன் *
 பெரியேன் ஆயினபின் * பிறர்க்கே உழைத்து ஏழை ஆனேன் **
 கரி சேர் பூம் பொழில் சூழ் * கன மா மலை வேங்கடவா! *
 அரியே வந்து அடைந்தேன் * அடியேனை ஆட் கொண்டருளே 7

நோற்றேன் பல் பிறவி * நுன்னைக் காண்பது ஓர் ஆசையினால் *
 ஏற்றேன் இப் பிறப்பே * இடர் உற்றனன் எம் பெருமான் **
 கோல் தேன் பாய்ந்து ஒழுகும் * குளிர் சோலை சூழ் வேங்கடவா *
 ஆற்றேன் வந்து அடைந்தேன் * அடியேனை ஆட் கொண்டருளே 8

பற்றேல் ஒன்றும் இலேன் * பாவமே செய்து பாவி ஆனேன் *
 மற்றேல் ஒன்று அறியேன் * மாயனே எங்கள் மாதவனே **
 கல் தேன் பாய்ந்து ஒழுகும் * கமலச் சுனை வேங்கடவா! *
 அற்றேன் வந்து அடைந்தேன் * அடியேனை ஆட் கொண்டருளே 9

கண் ஆய் ஏழ் உலகுக்கு உயிர் ஆய * எம் கார் வண்ணனை *
 விண்ணோர் தாம் பரவும் * பொழில் வேங்கட வேதியனை **
 திண் ஆர் மாடங்கள் சூழ் * திரு மங்கையர் கோன் கலியன் *
 பண் ஆர் பாடல் பத்தும் * பயில்வார்க்கு இல்லை பாவங்களே 10