Periya Tirumozhi — Decade 1, Chapter 7

அம் கண் ஞாலம் அஞ்ச * அங்கு ஓர் ஆள் அரி ஆய் * அவுணன்
 பொங்க ஆகம் வள் உகிரால் * போழ்ந்த புனிதன் இடம் **
 பைங் கண் ஆனைக் கொம்பு கொண்டு * பத்திமையால் * அடிக்கீழ்ச்
 செங் கண் ஆளி இட்டு இறைஞ்சும் * சிங்கவேள்குன்றமே 1

அலைத்த பேழ் வாய் * வாள் எயிற்று ஓர் கோளரி ஆய் * அவுணன்
 கொலைக் கையாளன் நெஞ்சு இடந்த * கூர் உகிராளன் இடம் **
 மலைத்த செல் சாத்து எறிந்த பூசல் * வன் துடி வாய் கடுப்ப *
 சிலைக் கை வேடர் தெழிப்பு அறாத * சிங்கவேள்குன்றமே 2

ஏய்ந்த பேழ் வாய் * வாள் எயிற்று ஓர் கோளரி ஆய் * அவுணன்
 வாய்ந்த ஆகம் வள் உகிரால் * வகிர்ந்த அம்மானது இடம் **
 ஓய்ந்த மாவும் உடைந்த குன்றும் * அன்றியும் நின்று அழலால் *
 தேய்ந்த வேயும் அல்லது இல்லாச் * சிங்கவேள்குன்றமே 3

எவ்வும் வெவ் வேல் பொன்பெயரோன் * ஏதலன் இன் உயிரை
 வவ்வி * ஆகம் வள் உகிரால் * வகிர்ந்த அம்மானது இடம் **
 கவ்வும் நாயும் கழுகும் * உச்சிப்போதொடு கால் சுழன்று *
 தெய்வம் அல்லால் செல்ல ஒண்ணாச் * சிங்கவேள்குன்றமே 4

மென்ற பேழ்வாய் * வாள் எயிற்று ஓர் கோளரி ஆய் * அவுணன்
 பொன்ற ஆகம் வள் உகிரால் * போழ்ந்த புனிதன் இடம் **
 நின்ற செந்தீ மொண்டு சூறை * நீள் விசும்பூடு இரிய *
 சென்று காண்டற்கு அரிய கோயில் * சிங்கவேள்குன்றமே 5

எரிந்த பைங் கண் இலங்கு பேழ் வாய் * எயிற்றொடு இது எவ் உரு என்று *
 இரிந்து வானோர் கலங்கி ஓட * இருந்த அம்மானது இடம் **
 நெரிந்த வேயின் முழையுள் நின்று * நீள் நெறிவாய் உழுவை *
 திரிந்த ஆனைச் சுவடு பார்க்கும் * சிங்கவேள்குன்றமே 6

முனைத்த சீற்றம் விண் சுடப் போய் * மூவுலகும் பிறவும் *
 அனைத்தும் அஞ்ச ஆள் அரி ஆய் * இருந்த அம்மானது இடம் **
 கனைத்த தீயும் கல்லும் அல்லா * வில் உடை வேடரும் ஆய் *
 தினைத்தனையும் செல்ல ஒண்ணாச் * சிங்கவேள்குன்றமே 7

நாத் தழும்ப நான்முகனும் * ஈசனும் ஆய் முறையால்
 ஏத்த * அங்கு ஓர் ஆள் அரி ஆய் * இருந்த அம்மானது இடம் **
 காய்த்த வாகை நெற்று ஒலிப்பக் * கல் அதர் வேய்ங்கழை போய் *
 தேய்த்த தீயால் விண் சிவக்கும் * சிங்கவேள்குன்றமே 8

நல்லை நெஞ்சே நாம் தொழுதும் * நம்முடை நம் பெருமான் *
 அல்லிமாதர் புல்க நின்ற * ஆயிரந் தோளன் இடம் **
 நெல்லி மல்கிக் கல் உடைப்பப் * புல் இலை ஆர்த்து * அதர்வாய்ச்
 சில்லி சில் என்று ஒல் அறாத * சிங்கவேள்குன்றமே 9

செங் கண் ஆளி இட்டு இறைஞ்சும் * சிஙகவேள்குன்று உடைய *
 எங்கள் ஈசன் எம் பிரானை * இருந் தமிழ் நூல் புலவன் **
 மங்கை ஆளன் மன்னு தொல் சீர் * வண்டு அரை தார்க் கலியன் *
 செங்கையாளன் செஞ்சொல் மாலை * வல்லவர் தீது இலரே 10