Periya Tirumozhi — Decade 6, Chapter 7

ஆளும் பணியும் அடியேனைக்
கொண்டான் * விண்ட நிசாசரரை *
தோளும் தலையும் துணிவு எய்தச் *
சுடு வெம் சிலைவாய்ச் சரம் துரந்தான் **
வேளும் சேயும் அனையாரும் *
வேல் கணாரும் பயில் வீதி *
நாளும் விழவின் ஒலி ஓவா *
நறையூர் நின்ற நம்பியே 1

முனி ஆய் வந்து மூவெழுகால் *
முடி சேர் மன்னர் உடல் துணிய *
தனி வாய் மழுவின் படை ஆண்ட *
தார் ஆர் தோளான் வார் புறவில் **
பனி சேர் முல்லை பல் அரும்பப் *
பானல் ஒருபால் கண் காட்ட *
நனி சேர் கமலம் முகங் காட்டும் *
நறையூர் நின்ற நம்பியே 2

தெள் ஆர் கடல்வாய் விட வாய *
சின வாள் அரவில் துயில் அமர்ந்து *
துள்ளா வரு மான் விழ வாளி
துரந்தான் * இரந்தான் மாவலி மண் **
புள் ஆர் புறவில் பூங் காவி *
புலங்கொள் மாதர் கண் காட்ட *
நள் ஆர் கமலம் முகம் காட்டும் *
நறையூர் நின்ற நம்பியே 3

ஒளியா வெண்ணெய் உண்டான் என்று *
உரலோடு ஆய்ச்சி ஒண் கயிற்றால் *
விளியா ஆர்க்க ஆப்புண்டு *
விம்மி அழுதான் மென் மலர்மேல் **
களியா வண்டு கள் உண்ண *
காமர் தென்றல் அலர் தூற்ற *
நளிர்வாய் முல்லை முறுவலிக்கும் *
நறையூர் நின்ற நம்பியே 4

வில் ஆர் விழவில் வட மதுரை *
விரும்பி விரும்பா மல் அடர்த்து *
கல் ஆர் திரள் தோள் கஞ்சனைக்
காய்ந்தான் * பாய்ந்தான் காளியன்மேல் **
சொல் ஆர் சுருதி முறை ஓதிச் *
சோமுச் செய்யும் தொழிலினோர் *
நல்லார் மறையோர் பலர் வாழும் *
நறையூர் நின்ற நம்பியே 5

வள்ளி கொழுநன் முதலாய *
மக்களோடு முக்கணான்
வெள்கி ஓட * விறல் வாணன் *
வியன் தோள் வனத்தைத் துணித்து உகந்தான் **
பள்ளி கமலத்திடைப் பட்ட *
பகு வாய் அலவன் முகம் நோக்கி *
நள்ளி ஊடும் வயல் சூழ்ந்த *
நறையூர் நின்ற நம்பியே 6

மிடையா வந்த வேல் மன்னர்
வீய * விசயன் தேர் கடவி *
குடையா வரை ஒன்று எடுத்து * ஆயர்
 கோ ஆய் நின்றான் கூர் ஆழிப்
படையான் ** வேதம் நான்கு ஐந்து
வேள்வி * அங்கம் ஆறு இசை ஏழ் *
நடையா வல்ல அந்தணர் வாழ் *
நறையூர் நின்ற நம்பியே 7

பந்து ஆர் விரலாள் பாஞ்சாலி *
கூந்தல் முடிக்க பாரதத்து *
கந்து ஆர் களிற்றுக் கழல் மன்னர்
கலங்கச் * சங்கம் வாய் வைத்தான் **
செந்தாமரைமேல் அயனோடு *
சிவனும் அனைய பெருமையோர் *
நந்தா வண் கை மறையோர் வாழ் *
நறையூர் நின்ற நம்பியே 8

ஆறும் பிறையும் அரவமும் *
அடம்பும் சடைமேல் அணிந்து * உடலம்
நீறும் பூசி ஏறு ஊரும் *
இறையோன் சென்று குறை இரப்ப **
மாறு ஒன்று இல்லா வாச நீர் *
வரை மார்வு அகலத்து அளித்து உகந்தான் *
நாறும் பொழில் சூழ்ந்து அழகு ஆய *
நறையூர் நின்ற நம்பியே 9

நன்மை உடைய மறையோர் வாழ் *
நறையூர் நின்ற நம்பியை *
கன்னி மதிள் சூழ் வயல் மங்கைக் *
கலியன் ஒலிசெய் தமிழ் மாலை **
பன்னி உலகில் பாடுவார் *
பாடு சாரா பழ வினைகள் *
மன்னி உலகம் ஆண்டு போய் *
வானோர் வணங்க வாழ்வாரே 10