Periya Tirumozhi — Decade 8, Chapter 7

வியம் உடை விடை இனம் * உடைதர மட மகள் *
குயம் மிடை தட வரை * அகலம் அது உடையவர் **
நயம் உடை நடை அனம் * இளையவர் நடை பயில் *
கயம் மிடை கணபுரம் * அடிகள் தம் இடமே 1

இணை மலி மருதினொடு * எருதிற இகல் செய்து *
துணை மலி முலையவள் * மணம் மிகு கலவியுள் **
மணம் மலி விழவினொடு * அடியவர் அளவிய *
கணம் மலி கணபுரம் * அடிகள் தம் இடமே 2

புயல் உறு வரை மழை * பொழிதர மணி நிரை *
மயல் உற வரை குடை * எடுவிய நெடியவர் **
முயல் துளர் மிளை முயல் துள * வள விளை வயல் *
கயல் துளு கணபுரம் * அடிகள் தம் இடமே 3

ஏதலர் நகைசெய * இளையவர் அளை வெணெய் *
போது செய்து அமரிய * புனிதர் நல் விரை ** மலர்
கோதிய மதுகரம் * குலவிய மலர் மகள் *
காதல்செய் கணபுரம் * அடிகள் தம் இடமே 4

தொண்டரும் அமரரும் * முனிவரும் தொழுது எழ *
அண்டமொடு அகல் இடம் * அளந்தவர் அமர்செய்து **
விண்டவர் பட * மதிள் இலங்கை முன் எரி எழ *
கண்டவர் கணபுரம் * அடிகள் தம் இடமே 5

மழுவு இயல் படை * உடையவன் இடம் மழை முகில் *
தழுவிய உருவினர் * திருமகள் மருவிய **
கொழுவிய செழு மலர் * முழுசிய பறவை பண் *
எழுவிய கணபுரம் * அடிகள் தம் இடமே 6

பரிதியொடு அணி மதி * பனி வரை திசை நிலம் *
எரி தியொடு என இன * இயல்வினர் செலவினர் **
சுருதியொடு அரு மறை * முறை சொலும் அடியவர் *
கருதிய கணபுரம் * அடிகள் தம் இடமே 7

படி புல்கும் அடி இணை * பலர் தொழ மலர் வைகு *
கொடி புல்கு தட வரை * அகலம் அது உடையவர் **
முடி புல்கு நெடு வயல் * படை செல அடி மலர் *
கடி புல்கு கணபுரம் * அடிகள் தம் இடமே 8

புல மனும் மலர்மிசை * மலர் மகள் புணரிய *
நிலமகள் என இன * மகளிர்கள் இவரொடும் **
வல மனு படையுடை * மணி வணர் நிதி குவை *
கல மனு கணபுரம் * அடிகள் தம் இடமே 9

மலி புகழ் கணபுரம் உடைய * எம் அடிகளை *
வலி கெழு மதிள் அயல் * வயல் அணி மங்கையர் **
கலியன தமிழ் இவை * விழுமிய இசையினொடு *
ஒலி சொலும் அடியவர் * உறு துயர் இலரே 10