Periya Tirumozhi — Decade 9, Chapter 5

தவள இளம் பிறை துள்ளும் முந்நீர்த் *
தண் மலர்த் தென்றலோடு அன்றில் ஒன்றித்
துவள * என் நெஞ்சகம் சோர ஈரும் *
சூழ் பனி நாள் துயிலாதிருப்பேன் **
இவளும் ஓர் பெண்கொடி என்று இரங்கார் *
என் நலம் ஐந்தும் முன் கொண்டு போன *
குவளை மலர் நிற வண்ணர் மன்னு *
குறுங்குடிக்கே என்னை உய்த்திடுமின் 1

தாது அவிழ் மல்லிகை புல்லி வந்த *
தண் மதியின் இள வாடை இன்னே *
ஊதை திரிதந்து உழறி உண்ண *
ஓர் இரவும் உறங்கேன் உறங்கும் **
பேதையர் பேதைமையால் இருந்து *
பேசிலும் பேசுக பெய்வளையார் *
கோதை நறு மலர் மங்கை மார்வன் *
குறுங்குடிக்கே என்னை உய்த்திடுமின் 2

காலையும் மாலை ஒத்துண்டு * கங்குல்
நாழிகை ஊழியில் நீண்டு உலாவும் *
போல்வது ஓர் தன்மை புகுந்து நிற்கும் *
பொங்கு அழலே ஒக்கும் வாடை சொல்லில் **
மாலவன் மா மணி வண்ணன் மாயம் *
மற்றும் உள அவை வந்திடாமுன் *
கோல மயில் பயிலும் புறவின் *
குறுங்குடிக்கே என்னை உய்த்திடுமின் 3

கரு மணி பூண்டு வெண் நாகு அணைந்து *
கார் இமில் ஏற்று அணர் தாழ்ந்து உலாவும் *
ஒரு மணி ஓசை என் உள்ளம் தள்ள *
ஓர் இரவும் உறங்காதிருப்பேன் **
பெரு மணி வானவர் உச்சி வைத்த *
பேர் அருளாளன் பெருமை பேசி *
குரு மணி நீர் கொழிக்கும் புறவின் *
குறுங்குடிக்கே என்னை உய்த்திடுமின் 4

திண் திமில் ஏற்றின் மணியும் * ஆயன்
தீம் குழல் ஒசையும் தென்றலோடு *
கொண்டது ஓர் மாலையும் அந்தி ஈன்ற *
கோல இளம்பிறையோடு கூடி **
பண்டைய அல்ல இவை நமக்கு *
பாவியேன் ஆவியை வாட்டம் செய்யும் *
கொண்டல் மணி நிற வண்ணர் மன்னு *
குறுங்குடிக்கே என்னை உய்த்திடுமின் 5

எல்லியும் நன் பகலும் இருந்தே *
ஏசிலும் ஏசுக ஏந்திழையார் *
நல்லர் அவர் திறம் நாம் அறியோம் *
நாண் மடம் அச்சம் நமக்கு இங்கு இல்லை **
வல்லன சொல்லி மகிழ்வரேலும் *
மா மணி வண்ணரை நாம் மறவோம் *
கொல்லை வளர் இள முல்லை புல்கு *
குறுங்குடிக்கே என்னை உய்த்திடுமின் 6

செங் கண் நெடிய கரிய மேனித் *
தேவர் ஒருவர் இங்கே புகுந்து * என்
அங்கம் மெலிய வளை கழல *
ஆதுகொலோ? என்று சொன்ன பின்னை **
ஐங்கணை வில்லி தன் ஆண்மை என்னோடு *
ஆடும் அதனை அறியமாட்டேன் *
கொங்கு அலர் தண் பணை சூழ் புறவின் *
குறுங்குடிக்கே என்னை உய்த்திடுமின் 7

கேவலம் அன்று கடலின் ஓசை *
கேள்மின்கள் ஆயன் கை ஆம்பல் வந்து * என்
ஆவி அளவும் அணைந்து நிற்கும் *
அன்றியும் ஐந்து கணை தெரிந்திட்டு **
ஏ வலம் காட்டி இவன் ஒருவன் *
இப்படியே புகுந்து எய்திடாமுன் *
கோவலர் கூத்தன் குறிப்பு அறிந்து *
குறுங்குடிக்கே என்னை உய்த்திடுமின் 8

சோத்து என நின்று தொழ இரங்கான் *
தொல் நலம் கொண்டு எனக்கு இன்றுதாறும் *
போர்ப்பது ஓர் பொன் படம் தந்து போனான் *
போயின ஊர் அறியேன் ** என் கொங்கை
மூத்திடுகின்றன * மற்று அவன் தன்
மொய் அகலம் அணையாது வாளா *
கூத்தன் இமையவர் கோன் விரும்பும் *
குறுங்குடிக்கே என்னை உய்த்திடுமின் 9

செற்றவன் தென் இலங்கை மலங்கத் *
தேவர் பிரான் திரு மா மகளைப்
பெற்றும் * என் நெஞ்சகம் கோயில் கொண்ட *
பேர் அருளாளன் பெருமை பேசக்
கற்றவன் ** காமரு சீர்க் கலியன் *
கண் அகத்தும் மனத்தும் அகலாக்
கொற்றவன் * முற்று உலகு ஆளி நின்ற *
குறுங்குடிக்கே என்னை உய்த்திடுமின் 10