Periya Tirumozhi — Decade 9, Chapter 9

மூவரில் முன் முதல்வன் * முழங்கு ஆர் கடலுள் கிடந்து *
பூ வளர் உந்தி தன்னுள் * புவனம் படைத்து உண்டு உமிழ்ந்த **
தேவர்கள் நாயகனைத் * திருமாலிருஞ்சோலை நின்ற *
கோவலர் கோவிந்தனைக் * கொடி ஏர் இடை கூடும்கொலோ? 1

புனை வளர் பூம் பொழில் ஆர் * பொன்னி சூழ் அரங்க நகருள்
முனைவனை * மூவுலகும் படைத்த * முதல் மூர்த்தி தன்னை **
சினை வளர் பூம் பொழில் சூழ் * திருமாலிருஞ்சோலை நின்றான் *
கனை கழல் காணும்கொலோ * கயல் கண்ணி எம் காரிகையே? 2

உண்டு உலகு ஏழினையும் * ஒரு பாலகன் ஆல் இலைமேல் *
கண்துயில் கொண்டு உகந்த * கரு மாணிக்க மா மலையை **
திண் திறல் மா கரி சேர் * திருமாலிருஞ்சோலை நின்ற *
அண்டர் தம் கோவினை இன்று * அணுகும்கொல் என் ஆய் இழையே? 3

சிங்கம் அது ஆய் அவுணன் * திறல் ஆகம் முன் கீண்டு உகந்த *
பங்கய மா மலர்க் கண் * பரனை எம் பரம் சுடரை **
திங்கள் நல் மா முகில் சேர் * திருமாலிருஞ்சோலை நின்ற *
நங்கள் பிரானை இன்று * நணுகும்கொல் என் நல் நுதலே? 4

தானவன் வேள்வி தன்னில் * தனியே குறள் ஆய் நிமிர்ந்து *
வானமும் மண்ணகமும் * அளந்த திரிவிக்கிரமன் **
தேன் அமர் பூம் பொழில் சூழ் * திருமாலிருஞ்சோலை நின்ற *
வானவர் கோனை இன்று * வணங்கித் தொழ வல்லள்கொலோ? 5

நேசம் இலாதவர்க்கும் * நினையாதவர்க்கும் அரியான் *
வாச மலர்ப் பொழில் சூழ் * வட மா மதுரைப் பிறந்தான் **
தேசம் எல்லாம் வணங்கும் * திருமாலிருஞ்சோலை நின்ற *
கேசவ நம்பி தன்னைக் * கெண்டை ஒண் கண்ணி காணும்கொலோ? 6

புள்ளினை வாய் பிளந்து * பொரு மா கரி கொம்பு ஒசித்து *
கள்ளச் சகடு உதைத்த * கரு மாணிக்க மா மலையை **
தெள் அருவி கொழிக்கும் * திருமாலிருஞ்சோலை நின்ற *
வள்ளலை வாள் நுதலாள் * வணங்கித் தொழ வல்லள்கொலோ? 7

பார்த்தனுக்கு அன்று அருளிப் * பாரதத்து ஒரு தேர் முன் நின்று *
காத்தவன் தன்னை * விண்ணோர் கரு மாணிக்க மா மலையை **
தீர்த்தனைப் பூம் பொழில் சூழ் * திருமாலிருஞ்சோலை நின்ற *
மூர்த்தியைக் கைதொழவும் * முடியும் கொல் என் மொய் குழற்கே? 8

வலம்புரி ஆழியனை * வரை ஆர் திரள் தோளன் தன்னை *
புலம் புரி நூலவனைப் * பொழில் வேங்கட வேதியனை **
சிலம்பு இயல் ஆறு உடைய * திருமாலிருஞ்சோலை நின்ற *
நலம் திகழ் நாரணனை * நணுகும் கொல் என் நல் நுதலே? 9

தேடற்கு அரியவனைத் * திருமாலிருஞ்சோலை நின்ற *
ஆடல் பறவையனை * அணி ஆய் இழை காணும் என்று **
மாடக் கொடி மதிள் சூழ் * மங்கையார் கலிகன்றி சொன்ன *
பாடல் பனுவல் பத்தும் * பயில்வார்க்கு இல்லை பாவங்களே 10