Periyalvar Tirumozhi — Decade 1, Chapter 8

பொன் இயல் கிண்கிணி * சுட்டி புறங் கட்டி *
 தன் இயல் ஓசை * சலன் சலன் என்றிட **
 மின் இயல் மேகம் * விரைந்து எதிர் வந்தாற்போல் *
 என் இடைக்கு ஓட்டரா அச்சோ அச்சோ *
 எம்பெருமான் வாராய் அச்சோ அச்சோ (1)

செங்கமலப் பூவில் * தேன் உண்ணும் வண்டே போல் *
 பங்கிகள் வந்து * உன் பவளவாய் மொய்ப்ப **
 சங்கு வில் வாள் தண்டு * சக்கரம் ஏந்திய *
 அங்கைகளாலே வந்து அச்சோ அச்சோ *
 ஆரத் தழுவாய் வந்து அச்சோ அச்சோ (2)

பஞ்சவர் தூதனாய்ப் * பாரதம் கைசெய்து *
 நஞ்சு உமிழ் நாகம் * கிடந்த நல் பொய்கை புக்கு **
 அஞ்சப் பணத்தின்மேல் * பாய்ந்திட்டு அருள்செய்த *
 அஞ்சனவண்ணனே அச்சோ அச்சோ *
 ஆயர் பெருமானே அச்சோ அச்சோ (3)

நாறிய சாந்தம் * நமக்கு இறை நல்கு என்ன *
 தேறி அவளும் * திருவுடம்பில் பூச **
 ஊறிய கூனினை * உள்ளே ஒடுங்க * அன்று
 ஏற உருவினாய் அச்சோ அச்சோ *
 எம்பெருமான் வாராய் அச்சோ அச்சோ (4)

கழல் மன்னர் சூழக் * கதிர் போல் விளங்கி *
 எழலுற்று மீண்டே * இருந்து உன்னை நோக்கும் **
 சுழலை பெரிது உடைத் * துச்சோதனனை *
 அழல விழித்தானே அச்சோ அச்சோ *
 ஆழி அங் கையனே அச்சோ அச்சோ (5)

போர் ஒக்கப் பண்ணி * இப் பூமிப்பொறை தீர்ப்பான் *
 தேர் ஒக்க ஊர்ந்தாய் * செழுந்தார் விசயற்காய் **
 கார் ஒக்கு மேனிக் * கரும் பெருங் கண்ணனே *
 ஆரத் தழுவாய் வந்து அச்சோ அச்சோ *
 ஆயர்கள் போரேறே அச்சோ அச்சோ (6)

மிக்க பெரும்புகழ் * மாவலி வேள்வியில் *
 தக்கது இது அன்று என்று * தானம் விலக்கிய **
 சுக்கிரன் கண்ணைத் * துரும்பாற் கிளறிய *
 சக்கரக் கையனே அச்சோ அச்சோ *
 சங்கம் இடத்தானே அச்சோ அச்சோ (7)

என் இது மாயம்? * என் அப்பன் அறிந்திலன் *
 முன்னைய வண்ணமே கொண்டு * அளவாய் என்ன **
 மன்னு நமுசியை * வானில் சுழற்றிய *
 மின்னு முடியனே அச்சோ அச்சோ *
 வேங்கடவாணனே அச்சோ அச்சோ (8)

கண்ட கடலும் * மலையும் உலகு ஏழும் *
 முண்டத்துக்கு ஆற்றா * முகில்வண்ணா ஓ என்று **
 இண்டைச் சடைமுடி * ஈசன் இரக்கொள்ள *
 மண்டை நிறைத்தானே அச்சோ அச்சோ *
 மார்வில் மறுவனே அச்சோ அச்சோ (9)

துன்னிய பேரிருள் * சூழ்ந்து உலகை மூட *
 மன்னிய நான்மறை * முற்றும் மறைந்திட **
 பின் இவ் உலகினில் * பேரிருள் நீங்க * அன்று
 அன்னமது ஆனானே அச்சோ அச்சோ *
 அருமறை தந்தானே அச்சோ அச்சோ (10)

நச்சுவார் முன் நிற்கும் * நாராயணன் தன்னை *
 அச்சோ வருக என்று * ஆய்ச்சி உரைத்தன **
 மச்சு அணி மாடப் * புதுவைக்கோன் பட்டன் சொல் *
 நிச்சலும் பாடுவார் * நீள் விசும்பு ஆள்வரே (11)