Periyalvar Tirumozhi — Decade 2, Chapter 5

பின்னை மணாளனைப் * பேரில் கிடந்தானை *
 முன்னை அமரர் * முதல் தனி வித்தினை **
 என்னையும் எங்கள் * குடி முழுது ஆட்கொண்ட *
 மன்னனை வந்து குழல்வாராய் அக்காக்காய் *
 மாதவன் தன் குழல்வாராய் அக்காக்காய் (1)

பேயின் முலை உண்ட * பிள்ளை இவன் முன்னம் *
 மாயச் சகடும் * மருதும் இறுத்தவன் **
 காயாமலர் வண்ணன் * கண்ணன் கருங்குழல் *
 தூய்து ஆக வந்து குழல்வாராய் அக்காக்காய் *
 தூமணி வண்ணன் குழல்வாராய் அக்காக்காய் (2)

திண்ணக் கலத்தில் * திரை உறிமேல் வைத்த *
 வெண்ணெய் விழுங்கி * விரைய உறங்கிடும்
 அண்ணல் ** அமரர் பெருமானை * ஆயர்தம்
 கண்ணனை வந்து குழல்வாராய் அக்காக்காய் *
 கார்முகில் வண்ணன் குழல்வாராய் அக்காக்காய் (3)

பள்ளத்தில் மேயும் * பறவை உருக் கொண்டு *
 கள்ள அசுரன் வருவானைத் தான் கண்டு **
 புள் இது என்று * பொதுக்கோ வாய் கீண்டிட்ட *
 பிள்ளையை வந்து குழல்வாராய் அக்காக்காய் *
 பேய் முலை உண்டான் குழல்வாராய் அக்காக்காய் (4)

கற்றினம் மேய்த்துக் * கனிக்கு ஒரு கன்றினைப் *
 பற்றி எறிந்த * பரமன் திருமுடி **
 உற்றன பேசி * நீ ஓடித் திரியாதே *
 அற்றைக்கும் வந்து குழல்வாராய் அக்காக்காய் *
 ஆழியான்தன் குழல்வாராய் அக்காக்காய் (5)

கிழக்கில் குடி மன்னர் * கேடு இலாதாரை *
 அழிப்பான் நினைந்திட்டு * அவ் ஆழிஅதனால் **
 விழிக்கும் அளவிலே * வேர் அறுத்தானைக் *
 குழற்கு அணி ஆகக் குழல்வாராய் அக்காக்காய் *
 கோவிந்தன்தன் குழல்வாராய் அக்காக்காய் (6)

பிண்டத் திரளையும் * பேய்க்கு இட்ட நீர்ச் சோறும் *
 உண்டற்கு வேண்டி * நீ ஓடித் திரியாதே **
 அண்டத்து அமரர் * பெருமான் அழகு அமர் *
 வண்டு ஒத்து இருண்ட குழல்வாராய் அக்காக்காய் *
 மாயவன்தன் குழல்வாராய் அக்காக்காய் (7)

உந்தி எழுந்த * உருவ மலர்தன்னில் *
 சந்தச் சதுமுகன் * தன்னைப் படைத்தவன் **
 கொந்தக் குழலைக் * குறந்து புளி அட்டி *
 தந்தத்தின் சீப்பால் குழல்வாராய் அக்காக்காய் *
 தாமோதரன்தன் குழல்வாராய் அக்காக்காய் (8)

மன்னன்தன் தேவிமார் * கண்டு மகிழ்வு எய்த *
 முன் இவ் உலகினை * முற்றும் அளந்தவன் **
 பொன்னின் முடியினைப் * பூ அணைமேல் வைத்து *
 பின்னே இருந்து குழல்வாராய் அக்காக்காய் *
 பேர் ஆயிரத்தான் குழல்வாராய் அக்காக்காய் (9)

கண்டார் பழியாமே * அக்காக்காய் * கார்வண்ணன்
 வண்டு ஆர் குழல்வார வா * என்ற ஆய்ச்சி சொல் **
 விண் தோய் மதிள் * வில்லிபுத்தூர்க் கோன் பட்டன் சொல் *
 கொண்டாடிப் பாடக் குறுகா வினை தாமே (10)