Periyalvar Tirumozhi — Decade 3, Chapter 2

அஞ்சன வண்ணனை * ஆயர் கோலக் கொழுந்தினை *
 மஞ்சனம் ஆட்டி * மனைகள்தோறும் திரியாமே **
 கஞ்சனைக் காய்ந்த * கழல் அடி நோவக் கன்றின்பின் *
 என்செயப் பிள்ளையைப் போக்கினேன்? * எல்லே பாவமே (1)

பற்றுமஞ்சள் பூசிப் * பாவைமாரொடு பாடியில் *
 சிற்றில் சிதைத்து எங்கும் * தீமை செய்து திரியாமே **
 கற்றுத் தூளியுடை * வேடர் கானிடைக் கன்றின் பின் *
 எற்றுக்கு என் பிள்ளையைப் போக்கினேன்? * எல்லே பாவமே (2)

நன்மணி மேகலை * நங்கைமாரொடு நாள்தொறும் *
 பொன்மணி மேனி * புழுதியாடித் திரியாமே **
 கல்மணி நின்று அதிர் * கான் அதரிடைக் கன்றின்பின் *
 என் மணிவண்ணனைப் போக்கினேன் * எல்லே பாவமே (3)

வண்ணக் கருங்குழல் * மாதர் வந்து அலர் தூற்றிடப் *
 பண்ணிப் பல செய்து * இப் பாடி எங்கும் திரியாமே **
 கண்ணுக்கு இனியானைக் * கான் அதரிடைக் கன்றின்பின் *
 எண்ணற்கு அரியானைப் போக்கினேன் * எல்லே பாவமே (4)

அவ்வவ் இடம் புக்கு * அவ் ஆயர் பெண்டிர்க்கு அணுக்கனாய் *
 கொவ்வைக் கனிவாய் கொடுத்துக் * கூழைமை செய்யாமே **
 எவ்வும் சிலை உடை * வேடர் கானிடைக் கன்றின் பின் *
 தெய்வத் தலைவனைப் போக்கினேன் * எல்லே பாவமே (5)

மிடறு மெழுமெழுத்து ஓட * வெண்ணெய் விழுங்கிப் போய் *
 படிறு பல செய்து * இப் பாடி எங்கும் திரியாமே **
 கடிறு பல திரி * கான் அதரிடைக் கன்றின் பின் *
 இடற என்பிள்ளையைப் போக்கினேன் * எல்லே பாவமே (6)

வள்ளி நுடங்கு இடை * மாதர் வந்து அலர் தூற்றிட *
 துள்ளி விளையாடித் * தோழரோடு திரியாமே **
 கள்ளி உணங்கு * வெங்கான் அதரிடைக் கன்றின் பின் *
 புள்ளின் தலைவனைப் போக்கினேன் * எல்லே பாவமே (7)

பன்னிரு திங்கள் * வயிற்றில் கொண்ட அப் பாங்கினால் *
 என் இளங் கொங்கை * அமுதம் ஊட்டி எடுத்து யான் **
 பொன்னடி நோவப் * புலரியே கானில் கன்றின் பின் *
 என் இளஞ் சிங்கத்தைப் போக்கினேன் * எல்லே பாவமே (8)

குடையும் செருப்பும் கொடாதே * தாமோதரனை நான் *
 உடையும் கடியன * ஊன்று வெம் பரற்கள் உடை **
 கடிய வெங் கானிடைக் * கால் அடி நோவக் கன்றின் பின் *
 கொடியென் என்பிள்ளையைப் போக்கினேன் * எல்லே பாவமே (9)

என்றும் எனக்கு இனியானை * என் மணிவண்ணனை *
 கன்றின் பின் போக்கினேன் என்று * அசோதை கழறிய **
 பொன் திகழ் மாடப் * புதுவையர்கோன் பட்டன் சொல் *
 இன் தமிழ் மாலைகள் வல்லவர்க்கு * இடர் இல்லையே (10)