Periyalvar Tirumozhi — Decade 4, Chapter 6

காசும் கறை உடைக் கூறைக்கும் * அங்கு ஓர் கற்றைக்கும்
 ஆசையினால் * அங்கு அவத்தப் பேர் இடும் ஆதர்காள் **
 கேசவன் பேர் இட்டு * நீங்கள் தேனித்து இருமினோ *
 நாயகன் நாரணன் * தம் அன்னை நரகம் புகாள் (1)

அங்கு ஒரு கூறை * அரைக்கு உடுப்பதன் ஆசையால் *
 மங்கிய மானிட சாதியின் * பேர் இடும் ஆதர்காள்! **
 செங்கண் நெடுமால்! * சிரீதரா என்று அழைத்தக்கால் *
 நங்கைகாள் நாரணன் * தம் அன்னை நரகம் புகாள் (2)

உச்சியில் எண்ணெயும் * சுட்டியும் வளையும் உகந்து *
 எச்சம் பொலிந்தீர்காள் * என் செய்வான் பிறர் பேர் இட்டீர்? **
 பிச்சை புக்கு ஆகிலும் * எம்பிரான் திருநாமமே
 நச்சுமின் * நாரணன் * தம் அன்னை நரகம் புகாள் (3)

மானிட சாதியில் தோன்றிற்று * ஓர் மானிட சாதியை *
 மானிட சாதியின் பேர் இட்டால் * மறுமைக்கு இல்லை **
 வான் உடை மாதவா * கோவிந்தா என்று அழைத்தக்கால் *
 நான் உடை நாரணன் * தம் அன்னை நரகம் புகாள் (4)

மலம் உடை ஊத்தையில் தோன்றிற்று ஓர் * மல ஊத்தையை *
 மலம் உடை ஊத்தையின் பேர் இட்டால் * மறுமைக்கு இல்லை **
 குலம் உடைக் கோவிந்தா கோவிந்தா * என்று அழைத்தக்கால் *
 நலம் உடை நாரணன் * தம் அன்னை நரகம் புகாள் (5)

நாடும் நகரும் அறிய * மானிடப் பேர் இட்டு *
 கூடி அழுங்கிக் * குழியில் வீழ்ந்து வழுக்காதே **
 சாடு இறப் பாய்ந்த தலைவா * தாமோதரா என்று
 நாடுமின் * நாரணன் * தம் அன்னை நரகம் புகாள் (6)

மண்ணில் பிறந்து மண் ஆகும் மானிடப் பேர் இட்டு அங்கு
 எண்ணம் ஒன்று இன்றி இருக்கும் * ஏழை மனிசர்காள் **
 கண்ணுக்கு இனிய * கருமுகில் வண்ணன் நாமமே
 நண்ணுமின் * நாரணன் * தம் அன்னை நரகம் புகாள் (7)

நம்பி பிம்பி என்று * நாட்டு மானிடப் பேர் இட்டால் *
 நம்பும் பிம்பும் எல்லாம் * நாலு நாளில் அழுங்கிப்போம் **
 செம்பெருந் தாமரைக் கண்ணன் * பேர் இட்டு அழைத்தக்கால் *
 நம்பிகாள்! நாரணன் * தம் அன்னை நரகம் புகாள் (8)

ஊத்தைக் குழியில் * அமுதம் பாய்வது போல் * உங்கள்
 மூத்திரப் பிள்ளையை * என் முகில் வண்ணன் பேர் இட்டு **
 கோத்துக் குழைத்துக் * குணாலம் ஆடித் திரிமினோ! *
 நாத் தகு நாரணன் * தம் அன்னை நரகம் புகாள் (9)

சீர் அணி மால் * திருநாமமே இடத் தேற்றிய *
 வீர் அணி தொல்புகழ் * விட்டுசித்தன் விரித்த ** சொல்
 ஓர் அணி ஒண் தமிழ் * ஒன்பதோடு ஒன்றும் வல்லவர் *
 பேர் அணி வைகுந்தத்து * என்றும் பேணி இருப்பரே (10)