Perumal Tirumozhi — Chapter 4

ஊன் ஏறு செல்வத்து * உடற்பிறவி யான் வேண்டேன் *
 ஆனேறு ஏழ் வென்றான் * அடிமைத் திறம் அல்லால் **
 கூன் ஏறு சங்கம் இடத்தான் * தன் வேங்கடத்து *
 கோனேரி வாழும் * குருகாய்ப் பிறப்பேனே (1)

ஆனாத செல்வத்து * அரம்பையர்கள் தன் சூழ *
 வான் ஆளும் செல்வமும் * மண் அரசும் யான் வேண்டேன் **
 தேன் ஆர் பூஞ்சோலைத் * திருவேங்கடச் சுனையில் *
 மீனாய்ப் பிறக்கும் * விதி உடையேன் ஆவேனே (2)

பின் இட்ட சடையானும் * பிரமனும் இந்திரனும் *
 துன்னிட்டுப் புகல் அரிய * வைகுந்த நீள் வாசல் **
 மின் வட்டச் சுடர் ஆழி * வேங்கடக்கோன் தான் உமிழும் *
 பொன் வட்டில் பிடித்து உடனே * புகப்பெறுவேன் ஆவேனே (3)

ஒண் பவள வேலை * உலவு தன் பாற்கடலுள் *
 கண் துயிலும் மாயோன் * கழலிணைகள் காண்பதற்கு **
 பண் பகரும் வண்டினங்கள் * பண் பாடும் வேங்கடத்து *
 செண்பகமாய் நிற்கும் * திரு உடையேன் ஆவேனே (4)

கம்ப மத யானைக் * கழுத்தகத்தின்மேல் இருந்து *
 இன்பு அமரும் செல்வமும் * இவ் அரசும் யான் வேண்டேன் **
 எம்பெருமான் ஈசன் * எழில் வேங்கட மலை மேல் *
 தம்பகமாய் நிற்கும் * தவம் உடையேன் ஆவேனே (5)

மின் அனைய நுண்ணிடையார் * உருப்பசியும் மேனகையும் *
 அன்னவர்தம் பாடலொடும் * ஆடல் அவை ஆதரியேன் **
 தென்ன என வண்டினங்கள் * பண் பாடும் வேங்கடத்துள் *
 அன்னனைய பொற்குவடாம் * அருந்தவத்தென் ஆவேனே (6)

வான் ஆளும் மா மதி போல் * வெண் குடைக்கீழ் மன்னவர் தம் *
 கோன் ஆகி வீற்றிருந்து * கொண்டாடும் செல்வு அறியேன் **
 தேன் ஆர் பூஞ்சோலைத் * திருவேங்கட மலை மேல் *
 கானாறாய்ப் பாயும் * கருத்து உடையேன் ஆவேனே (7)

பிறை ஏறு சடையானும் * பிரமனும் இந்திரனும் *
 முறையாய பெரு வேள்விக் * குறை முடிப்பான் மறை ஆனான் **
 வெறியார் தண் சோலைத் * திருவேங்கட மலை மேல் *
 நெறியாய்க் கிடக்கும் * நிலை உடையேன் ஆவேனே (8)

செடியாய வல்வினைகள் தீர்க்கும் * திருமாலே *
 நெடியானே வேங்கடவா * நின் கோயிலின் வாசல் **
 அடியாரும் வானவரும் * அரம்பையரும் கிடந்து இயங்கும் *
 படியாய்க் கிடந்து * உன் பவளவாய் காண்பேனே (9)

உம்பர் உலகு ஆண்டு * ஒரு குடைக்கீழ் உருப்பசி தன் *
 அம்பொன் கலை அல்குல் * பெற்றாலும் ஆதரியேன் **
 செம் பவள வாயான் * திருவேங்கடம் என்னும் *
 எம்பெருமான் பொன்மலை மேல் * ஏதேனும் ஆவேனே (10)

மன்னிய தண் சாரல் * வட வேங்கடத்தான் தன் *
 பொன் இயலும் சேவடிகள் * காண்பான் புரிந்து இறைஞ்சி **
 கொல் நவிலும் கூர்வேல் * குலசேகரன் சொன்ன *
 பன்னிய நூல் தமிழ் வல்லார் * பாங்காய பத்தர்களே (11)