Thiruvaymozhi — Decade 1, Chapter 5

வள ஏழ் உலகின் முதலாய * வானோர் இறையை அருவினையேன்
 களவேழ் வெண்ணெய் தொடு உண்ட * கள்வா! * என்பன் பின்னையும் **
 தளவு ஏழ் முறுவல் பின்னைக்கு ஆய் * வல் ஆன் ஆயர் தலைவனாய் *
 இள ஏறு ஏழும் தழுவிய * எந்தாய் ! என்பன் நினைந்து நைந்தே (1)

நினைந்து நைந்து உள் கரைந்து உருகி * இமையோர் பலரும் முனிவரும் *
 புனைந்த கண்ணி நீர் சாந்தம் * புகையோடு ஏந்தி வணங்கினால் **
 நினைந்த எல்லாப் பொருள்கட்கும் * வித்துஆய் முதலில் சிதையாமே
 மனம் செய் ஞானத்து உன் பெருமை * மாசூணாதோ? மாயோனே !(2)

மா யோனிகளாய் நடை கற்ற * வானோர் பலரும் முனிவரும் *
 நீ யோனிகளைப் படை என்று * நிறை நான்முகனைப் படைத்தவன் **
 சேயோன் எல்லா அறிவுக்கும் * திசைகள் எல்லாம் திருவடியால்
 தாயோன் * எல்லா எவ் உயிர்க்கும் தாயோன் * தான் ஓர் உருவனே (3)

தான் ஓர் உருவே தனி வித்து ஆய்த் * தன்னில் மூவர் முதலாய *
 வானோர் பலரும் முனிவரும் * மற்றும் மற்றும் முற்றும் ஆய் **
 தான் ஓர் பெருநீர் தன்னுள்ளே தோற்றி * அதனுள் கண்வளரும் *
 வானோர் பெருமான் மா மாயன் * வைகுந்தன் எம் பெருமானே (4) **

மான் ஏய் நோக்கி மடவாளை * மார்பில் கொண்டாய் ! மாதவா ! *
 கூனே சிதைய உண்டை வில் * நிறத்தில் தெறித்தாய் * கோவிந்தா ! **
 வான் ஆர் சோதி மணிவண்ணா ! மதுசூதா ! நீ அருளாய் * உன்
 தேனே மலரும் திருப்பாதம் * சேருமாறு வினையேனே (5)

வினையேன் வினை தீர் மருந்து ஆனாய் ! * விண்ணோர் தலைவா ! கேசவா ! *
 மனை சேர் ஆயர் குலமுதலே ! * மா மாயனே ! மாதவா ! **
 சினை ஏய் தழைய மராமரங்கள் ! * ஏழும் எய்தாய் சிரீதரா! *
 இனையாய் ! இனைய பெயரினாய் ! * என்று நைவன் அடியேனே (6)

அடியேன் சிறிய ஞானத்தன் * அறிதல் ஆர்க்கும் அரியானை *
 கடி சேர் தண் அம் துழாய்க் * கண்ணி புனைந்தான் தன்னைக் கண்ணனை **
 செடி ஆர் ஆக்கை அடியாரைச் * சேர்தல் தீர்க்கும் திருமாலை *
 அடியேன் காண்பான் அலற்றுவன் * இதனின் மிக்கு ஓர் அயர்வு உண்டே? (7)

உண்டாய் உலகு ஏழ் முன்னமே * உமிழ்ந்து மாயையால் புக்கு *
 உண்டாய் வெண்ணெய் சிறு மனிசர் * உவலை ஆக்கை நிலை எய்தி **
 மண் தான் சோர்ந்தது உண்டேலும் * மனிசர்க்கு ஆகும் பீர் சிறிதும் *
 அண்டாவண்ணம் மண் கரைய * நெய் ஊண் மருந்தோ? மாயோனே (8)

மாயோம் தீய அலவலைப் * பெரு மா வஞ்சப் பேய் வீயத் *
 தூய குழவியாய் விடப் பால் அமுதா * அமுது செய்திட்ட
 மாயன் ** வானோர் தனித் தலைவன் மலராள் மைந்தன் * எவ் உயிர்க்கும்
 தாயோன் * தம்மான் என் அம்மான் * அம்மா மூர்த்தியைச் சார்ந்தே (9)

சார்ந்த இரு வல் வினைகளும் சரித்து * மாயப் பற்று அறுத்து *
 தீர்ந்து தன்பால் மனம் வைக்கத் திருத்தி வீடு * திருத்துவான் **
 ஆர்ந்த ஞானச் சுடர் ஆகி * அகலம் கீழ் மேல் அளவு இறந்து *
 நேர்ந்த உருவாய் அருவாகும் * இவற்றின் உயிராம் நெடுமாலே !(10)

மாலே ! மாயப் பெருமானே ! * மா மாயனே ! என்று என்று *
 மாலே ஏறி மால் அருளால் * மன்னு குருகூர்ச் சடகோபன் **
 பால் ஏய் தமிழர் இசைகாரர் * பத்தர் பரவும் ஆயிரத்தின்
 பாலே * பட்ட இவை பத்தும் * வல்லார்க்கு இல்லை பரிவதே (11)