Thiruvaymozhi — Decade 1, Chapter 6

பரிவது இல் ஈசனைப் பாடி * விரிவது மேவல் உறுவீர் **
 பிரிவகை இன்றி நல் நீர் தூய் * புரிவதுவும் புகை பூவே (1)

மதுவார் தண் அம் துழாயான் * முது வேத முதல்வனுக்கு **
 எது ஏது ? என் பணி ? என்னாது * அதுவே ஆள் செய்யும் ஈடே (2)

ஈடும் எடுப்பும் இல் ஈசன் * மாடு விடாது என் மனனே **
 பாடும் என் நா அவன் பாடல் * ஆடும் என் அங்கம் அணங்கே (3)

அணங்கு என ஆடும் என் அங்கம் * வணங்கி வழிபடும் ஈசன் **
 பிணங்கி அமரர் பிதற்றும் * குணங்கெழு கொள்கையினானே (4)

கொள்கை கொளாமை * இலாதான் எள்கல் இராகம் இலாதான் **
 விள்கை விள்ளாமை விரும்பி * உள் கலந்தார்க்கு ஓர் அமுதே (5)

அமுதம் அமரர்கட்கு ஈந்த * நிமிர் சுடர் ஆழி நெடுமால் **
 அமுதிலும் ஆற்ற இனியன் * நிமிர் திரை நீள் கடலானே (6)

நீள் கடல் சூழ் இலங்கைக் கோன் * தோள்கள் தலை துணிசெய்தான் **
 தாள்கள் தலையில் வணங்கி * நாள்கள் தலைக்கழிமினே (7)

கழிமின் தொண்டீர்கள் ! கழித்து * தொழுமின் அவனைத் தொழுதால் **
 வழி நின்ற வல்வினை மாள்வித்து * அழிவின்றி ஆக்கம் தருமே (8)

தருமம் அரும் பயன் ஆய * திருமகளார் தனிக் கேள்வன் **
 பெருமை உடைய பிரானார் * இருமை வினை கடிவாரே (9)

கடிவார் தீய வினைகள் * நொடியாரும் அளவைக்கண் **
 கொடியா அடு புள் உயர்த்த * வடிவு ஆர் மாதவனாரே (10)

மாதவன்பால் சடகோபன் * தீது அவம் இன்றி உரைத்த **
 ஏதம் இல் ஆயிரத்து இப் பத்து * ஓத வல்லார் பிறவாரே (11)