Thiruvaymozhi — Decade 1, Chapter 7

பிறவித்துயர் அற * ஞானத்துள் நின்று *
 துறவிச் சுடர் * விளக்கம் தலைப்பெய்வார் **
 அறவனை * ஆழிப்படை அந்தணனை *
 மறவியை இன்றி * மனத்து வைப்பாரே (1)

வைப்பு ஆம் மருந்து ஆம் * அடியரை * வல்வினைத்
 துப்பு ஆம் புலன் ஐந்தும் * துஞ்சக்கொடான் அவன் **
 எப்பால் எவர்க்கும் * நலத்தால் உயர்ந்து உயர்ந்து *
 அப்பாலவன் * எங்கள் ஆயர் கொழுந்தே (2)

ஆயர் கொழுந்தாய் * அவரால் புடையுண்ணும் *
 மாயப் பிரானை * என் மாணிக்கச் சோதியை **
 தூய அமுதைப் * பருகிப் பருகி * என்
 மாயப் பிறவி * மயர்வு அறுத்தேனே (3)

மயர்வு அற என் மனத்தே * மன்னினான் தன்னை *
 உயர்வினையே தரும் * ஒண் சுடர்க் கற்றையை **
 அயர்வு இல் அமரர்கள் * ஆதிக் கொழுந்தை * என்
 இசைவினை * என் சொல்லி யான் விடுவேனோ? (4)

விடுவேனோ? என் விளக்கை * என் ஆவியை *
 நடுவே வந்து * உய்யக் கொள்கின்ற நாதனை **
 தொடுவே செய்து * இள ஆய்ச்சியர் கண்ணினுள் *
 விடவே செய்து * விழிக்கும் பிரானையே? (5)

பிரான் * பெரு நிலம் கீண்டவன் * பின்னும்
 விரா அய் மலர்த் துழாய் * வேய்ந்த முடியன் **
மராமரம் * எய்த மாயவன் * என்னுள்
 இரான் எனில் * பின்னை யான் ஒட்டுவேனோ? (6) *

யான் ஒட்டி என்னுள் * இருத்துவன் என்றிலன் *
 தான் ஒட்டி வந்து * என் தனி நெஞ்சை வஞ்சித்து **
 ஊன் ஒட்டி நின்று * என் உயிரில் கலந்து * இயல்
 வான் ஒட்டுமோ? * இனி என்னை நெகிழ்க்கவே? (7)

என்னை நெகிழ்க்கிலும் * என்னுடை நன் நெஞ்சம்
 தன்னை * அகல்விக்கத் * தானும் கில்லான் இனி **
 பின்னை நெடும் பணைத் தோள் * மகிழ் பீடு உடை *
 முன்னை அமரர் * முழுமுதல் தானே (8)

அமரர் முழுமுதல் * ஆகிய ஆதியை *
 அமரர்க்கு அமுது ஈந்த * ஆயர் கொழுந்தை **
 அமர அழும்பத் * துழாவி என் ஆவி *
 அமரத் தழுவிற்று * இனி அகலுமோ? (9)

அகலில் அகலும் * அணுகில் அணுகும் *
 புகலும் அரியன் * பொரு அல்லன் எம்மான் **
 நிகர் இல் அவன் புகழ் * பாடி இளைப்பு இலம் *
 பகலும் இரவும் * படிந்து குடைந்தே (10)

* குடைந்து வண்டு உண்ணும் * துழாய் முடியானை *
 அடைந்த தென் குருகூர்ச் * சடகோபன் **
 மிடைந்த சொல் தொடை * ஆயிரத்து இப் பத்து *
 உடைந்து நோய்களை * ஓடுவிக்குமே (11)