Thiruvaymozhi — Decade 3, Chapter 10

சன்மம் பலபல செய்து வெளிப்பட்டுச் *
 சங்கொடு சக்கரம் வில் *
 ஒண்மை உடைய உலக்கை ஒள் வாள் *
 தண்டு கொண்டு புள் ஊர்ந்து ** உலகில்
 வன்மை உடைய அரக்கர் * அசுரரை
 மாளப் படை பொருத *
 நன்மை உடையவன் சீர் பரவப் பெற்ற *
 நான் ஓர் குறைவு இலனே (1)

குறைவு இல் தடங் கடல் கோள் அரவு ஏறித் *
 தன் கோலச் செந்தாமரைக்கண் *
 உறைபவன் போல ஓர் யோகு புணர்ந்த *
 ஒளி மணி வண்ணன் கண்ணன் **
 கறை அணி மூக்கு உடைப் புள்ளைக் கடாவி *
 அசுரரைக் காய்ந்த அம்மான் *
 நிறை புகழ் ஏத்தியும் பாடியும் ஆடியும் *
 யான் ஒரு முட்டு இலனே (2)

முட்டு இல் பல் போகத்து ஒரு தனி நாயகன் *
 மூவுலகுக்கு உரிய *
 கட்டியைத் தேனை அமுதை *
 நன்பாலைக் கனியைக் கரும்பு தன்னை **
 மட்டு அவிழ் தண் அம் துழாய் முடியானை வணங்கி *
 அவன் திறத்துப்
 பட்ட பின்னை * இறையாகிலும் *
 யான் என் மனத்துப் பரிவு இலனே (3)

பரிவு இன்றி வாணனைக் காத்தும் * என்று
 அன்று படையொடும் வந்து எதிர்ந்த *
 திரிபுரம் செற்றவனும் மகனும் *
 பின்னும் அங்கியும் போர் தொலைய **
 பொரு சிறைப் புள்ளைக் கடாவிய
 மாயனை * ஆயனைப் பொன் சக்கரத்து
 அரியினை * அச்சுதனைப் பற்றி *
 யான் இறையேனும் இடர் இலனே (4)

இடர் இன்றியே ஒரு நாள் ஒரு போழ்தில் *
 எல்லா உலகும் கழிய *
 படர் புகழ்ப் பார்த்தனும் வைதிகனும் *
 உடன் ஏறத் திண் தேர் கடவி **
 சுடர் ஒளியாய் நின்ற தன்னுடைச் சோதியில் *
 வைதிகன் பிள்ளைகளை *
 உடலொடும் கொண்டு கொடுத்தவனைப் பற்றி *
 ஒன்றும் துயர் இலனே (5)

துயர் இல் சுடர் ஒளி தன்னுடைச் சோதி *
 நின்ற வண்ணம் நிற்கவே *
 துயரில் மலியும் மனிசர் பிறவியில் *
 தோன்றிக்கண் காண வந்து **
 துயரங்கள் செய்து தன் தெய்வநிலை உலகில் *
 புக உய்க்கும் அம்மான் *
 துயரம் இல் சீர்க் கண்ணன் மாயன் புகழ் துற்ற *
 யான் ஓர் துன்பம் இலனே (6)

துன்பமும் இன்பமும் ஆகிய *
 செய்வினை ஆய் உலகங்களும் ஆய் *
 இன்பம் இல் வெம் நரகு ஆகி *
 இனிய நல் வான் சுவர்க்கங்களும் ஆய் **
 மன் பல் உயிர்களும் ஆகிப் *
 பலபல மாய மயக்குக்களால் *
 இன்புறும் இவ் விளையாட்டு உடையானைப் பெற்று *
 ஏதும் அல்லல் இலனே (7)

அல்லல் இல் இன்பம் அளவு இறந்து எங்கும் *
 அழகு அமர் சூழ் ஒளியன் *
 அல்லி மலர் மகள் போக மயக்குக்கள் *
 ஆகியும் நிற்கும் அம்மான் **
 எல்லை இல் ஞானத்தன் ஞானம் அஃதே கொண்டு *
 எல்லாக் கருமங்களும் செய் *
 எல்லை இல் மாயனைக் கண்ணனைத் தாள் பற்றி *
 யான் ஓர் துக்கம் இலனே (8)

துக்கம் இல் ஞானச் சுடர் ஒளி மூர்த்தி *
 துழாய் அலங்கல் பெருமான் *
 மிக்க பல் மாயங்களால் விகிர்தம் செய்து *
 வேண்டும் உருவு கொண்டு **
 நக்க பிரானோடு அயன் முதலாக *
 எல்லாரும் எவையும் * தன்னுள்
 ஒக்க ஒடுங்க விழுங்க வல்லானைப் பெற்று *
 ஒன்றும் தளர்வு இலனே (9)

தளர்வு இன்றியே என்றும் எங்கும் பரந்த *
 தனிமுதல் ஞானம் ஒன்றாய் *
 அளவு உடை ஐம்புலன்கள் அறியாவகையால் *
 அருவு ஆகி நிற்கும் **
 வளர் ஒளி ஈசனை மூர்த்தியைப் *
 பூதங்கள் ஐந்தை இரு சுடரை *
 கிளர் ஒளி மாயனைக் கண்ணனைத் தாள் பற்றி *
 யான் என்றும் கேடு இலனே (10)

கேடு இல் விழுப் புகழ்க் கேசவனைக் *
 குருகூர்ச் சடகோபன் சொன்ன *
 பாடல் ஓர் ஆயிரத்துள் *
 இவை ஒரு பத்தும் பயிற்ற வல்லார்கட்கு ** அவன்
 நாடும் நகரமும் நன்குடன் காண *
 நலனிடை ஊர்தி பண்ணி *
 வீடும் பெறுத்தித் தன் மூவுலகுக்கும் தரும் *
 ஒரு நாயகமே (11)