Thiruvaymozhi — Decade 5, Chapter 7

நோற்ற நோன்பு இலேன் நுண் அறிவு இலேன் * ஆகிலும் இனி உன்னை விட்டு * ஒன்றும்
 ஆற்ற கிற்கின்றிலேன் * அரவின் அணை அம்மானே **
 சேற்றுத் தாமரை செந்நெல் ஊடு மலர் * சிரீவரமங்கல நகர் *
 வீற்றிருந்த எந்தாய் * உனக்கு மிகை அல்லேன் அங்கே * (1)

அங்குற்றேன் அல்லேன் இங்குற்றேன் அல்லேன் * உன்னைக் காணும் அவாவில் வீழ்ந்து * நான்
 எங்குற்றேனும் அல்லேன் * இலங்கை செற்ற அம்மானே **
 திங்கள் சேர் மணி மாட நீடு * சிரீவரமங்கலநகர் உறை *
 சங்கு சக்கரத்தாய் * தமியேனுக்கு அருளாயே * (2)

கருளப் புள் கொடி சக்கரப் படை * வான நாட என் கார்முகில் வண்ணா *
 பொருள் அல்லாத என்னைப் பொருளாக்கி * அடிமைகொண்டாய் **
 தெருள் கொள் நான்மறை வல்லவர் பலர் வாழ் * சிரீவரமங்கலநகர்க்கு *
 அருள்செய்து அங்கு இருந்தாய் * அறியேன் ஒரு கைம்மாறே * (3)

மாறு சேர் படை நூற்றுவர் மங்க * ஓர் ஐவர்க்கு ஆய் அன்று மாயப்போர் பண்ணி *
 நீறு செய்த எந்தாய் * நிலம் கீண்ட அம்மானே **
 தேறு ஞானத்தர் வேத வேள்வி அறாச் * சிரீவரமங்கலநகர் *
 ஏறி வீற்றிருந்தாய் * உன்னை எங்கு எய்தக் கூவுவனே? * (4)

எய்தக் கூவுதல் ஆவதே எனக்கு? * எவ்வ தெவ்வத்துள் ஆயுமாய் நின்று *
 கைதவங்கள் செய்யும் * கரு மேனி அம்மானே **
 செய்த வேள்வியர் வையத்தேவர் அறாச் * சிரீவரமங்கலநகர் *
 கைதொழ இருந்தாய் * அது நானும் கண்டேனே (5)

ஏனம் ஆய் நிலம் கீண்ட என் அப்பனே கண்ணா * என்றும் என்னை ஆளுடை *
 வான நாயகனே * மணி மாணிக்கச்சுடரே **
 தேன மாம்பொழில் தண் சிரீவரமங்கலத்தவர் * கைதொழ உறை *
 வானமாமலையே * அடியேன் தொழ வந்தருளே (6)

வந்தருளி என் நெஞ்சு இடம் கொண்ட * வானவர் கொழுந்தே * உலகுக்கு ஓர்
 முந்தைத் தாய் தந்தையே * முழு ஏழ் உலகும் உண்டாய் **
 செந்தொழிலவர் வேத வேள்வி அறாச் * சிரீவரமங்கலநகர் *
 அந்தம் இல் புகழாய் * அடியேனை அகற்றேலே * (7)

அகற்ற நீ வைத்த மாய வல்லை * ஐம்புலன்களாம் அவை * நன்கு அறிந்தனன் *
 அகற்றி என்னையும் நீ * அரும் சேற்றில் வீழ்த்திகண்டாய் **
 பகல் கதிர் மணி மாட நீடு * சிரீவரமங்கை வாணனே * என்றும்
 புகற்கு அரிய எந்தாய் * புள்ளின் வாய் பிளந்தானே * (8)

புள்ளின் வாய் பிளந்தாய்! மருது இடை போயினாய் * எருது ஏழ் அடர்த்த * என்
 கள்ள மாயவனே! * கருமாணிக்கச் சுடரே **
 தெள்ளியார் திரு நான்மறைகள் வல்லார் * மலி தண் சிரீவரமங்கை *
 உள் இருந்த எந்தாய் * அருளாய் உய்யுமாறு எனக்கே * (9)

ஆறு எனக்கு நின் பாதமே * சரண் ஆகத் தந்தொழிந்தாய் * உனக்கு ஓர் கைம்
 மாறு நான் ஒன்று இலேன் * எனது ஆவியும் உனதே **
 சேறு கொள் கரும்பும் பெரும் செந்நெலும் * மலி தண் சிரீவரமங்கை *
 நாறு பூந் தண் துழாய் முடியாய் * தெய்வ நாயகனே * (10)

தெய்வ நாயகன் நாரணன் * திரிவிக்கிரமன் அடி இணைமிசை *
 கொய் கொள் பூம் பொழில் சூழ் * குருகூர்ச் சடகோபன் **
 செய்த ஆயிரத்துள் இவை * தண் சிரீவரமங்கை மேய பத்துடன் *
 வைகல் பாட வல்லார் * வானோர்க்கு ஆரா அமுதே * (11)