Thiruvaymozhi — Decade 8, Chapter 2

நங்கள் வரிவளை ஆயங்காளோ *
 நம்முடை ஏதலர் முன்பு நாணி *
 நுங்கட்கு யான் ஒன்று உரைக்கும் மாற்றம் *
 நோக்குகின்றேன் எங்கும் காணமாட்டேன் **
 சங்கம் சரிந்தன சாய் இழந்தேன் *
 தட முலை பொன் நிறமாய்த் தளர்ந்தேன் *
 வெங்கண் பறவையின் பாகன் எங்கோன் *
 வேங்கடவாணனை வேண்டிச் சென்றே (1)

வேண்டிச் சென்று ஒன்று பெறுகிற்பாரில் *
 என்னுடைத் தோழியர் நுங்கட்கேலும் *
 ஈண்டு இது உரைக்கும் படியை அந்தோ *
 காண்கின்றிலேன் இடராட்டியேன் நான் **
 காண் தகு தாமரைக் கண்ணன் கள்வன் *
 விண்ணவர் கோன் நங்கள் கோனைக் கண்டால் *
 ஈண்டிய சங்கும் நிறைவும் கொள்வான் *
 எத்தனை காலம் இளைக்கின்றேனே (2)

காலம் இளைக்கில் அல்லால் வினையேன்
 நான் இளைக்கின்றிலன் * கண்டுகொள்மின் *
 ஞாலம் அறியப் பழி சுமந்தேன் *
 நல் நுதலீர் இனி நாணித் தான் என் **
 நீல மலர் நெடும் சோதி சூழ்ந்த *
 நீண்ட முகில் வண்ணன் கண்ணன் கொண்ட *
 கோல வளையொடும் மாமை கொள்வான் *
 எத்தனை காலமும் கூடச் சென்றே? (3)

கூடச் சென்றேன் இனி என் கொடுக்கேன்? *
 கோல்வளை நெஞ்சத் தொடக்கம் எல்லாம் *
 பாடு அற்று ஒழிய இழந்து வைகல் *
 பல்வளையார்முன் பரிசு அழிந்தேன் **
 மாடக் கொடி மதிள் தென் குளந்தை *
 வண் குடபால் நின்ற மாயக் கூத்தன் *
 ஆடல் பறவை உயர்த்த வெல் போர் *
 ஆழிவலவனை ஆதரித்தே (4)

ஆழிவலவனை ஆதரிப்பும் *
 ஆங்கு அவன் நம்மில் வரவும் எல்லாம் *
 தோழியர்காள் நம் உடையமேதான்? *
 சொல்லுவதோ இங்கு அரியதுதான் **
 ஊழிதோறு ஊழி ஒருவனாக *
 நன்கு உணர்வார்க்கும் உணரலாகா *
 சூழல் உடைய சுடர் கொள் ஆதித் *
 தொல்லை அம் சோதி நினைக்குங்காலே? (5)

தொல்லை அம் சோதி நினைக்குங்கால் * என்
 சொல் அளவு அன்று இமையோர் தமக்கும் *
 எல்லை இலாதன கூழ்ப்புச் செய்யும் *
 அத் திறம் நிற்க எம் மாமை கொண்டான் **
 அல்லி மலர்த் தண் துழாயும் தாரான் *
 ஆர்க்கு இடுகோ இனிப் பூசல்? சொல்லீர்! *
 வல்லி வள வயல் சூழ் குடந்தை *
 மா மலர்க்கண் வளர்கின்ற மாலே (6)

மால் அரி கேசவன் நாரணன் * சீமாதவன்
 கோவிந்தன் வைகுந்தன் என்று என்று *
 ஓலம் இட என்னைப் பண்ணி விட்டிட்டு *
 ஒன்றும் உருவும் சுவடும் காட்டான் **
 ஏல மலர்க்குழல் அன்னைமீர்காள் *
 என்னுடைத் தோழியர்காள் * என் செய்கேன்? *
 காலம் பல சென்றும் காண்பது ஆணை *
 உங்களோடு எங்கள் இடை இல்லையே (7)

இடை இல்லை யான் வளர்த்த கிளிகாள் *
 பூவைகள்காள் குயில்காள் மயில்காள்! *
 உடைய நம் மாமையும் சங்கும் நெஞ்சும் *
 ஒன்றும் ஒழிய ஒட்டாது கொண்டான் **
 அடையும் வைகுந்தமும் பாற்கடலும் *
 அஞ்சன வெற்பும் அவை நணிய *
 கடையறப் பாசங்கள் விட்டபின்னை அன்றி *
 அவன் அவை காண்கொடானே (8)

காண்கொடுப்பான் அல்லன் ஆர்க்கும் தன்னைக் *
 கைசெய் அப்பாலது ஓர் மாயம் தன்னால் *
 மாண் குறள் கோல வடிவு காட்டி *
 மண்ணும் விண்ணும் நிறைய மலர்ந்த **
 சேண் சுடர்த் தோள்கள் பல தழைத்த *
 தேவ பிராற்கு என் நிறைவினோடு *
 நாண் கொடுத்தேன் இனி என் கொடுக்கேன் *
 என்னுடை நல் நுதல் நங்கைமீர்காள்? (9)

என்னுடை நல் நுதல் நங்கைமீர்காள் *
 யான் இனிச் செய்வது என் நெஞ்சு என்னை *
 நின் இடையேன் அல்லேன் என்று நீங்கி *
 நேமியும் சங்கும் இருகைக் கொண்டு **
 பல் நெடும் சூழ் சுடர் ஞாயிற்றோடு *
 பால் மதி ஏந்தி ஓர் கோல நீல *
 நல் நெடும் குன்றம் வருவது ஒப்பான் *
 நாள் மலர்ப் பாதம் அடைந்ததுவே (10)

பாதம் அடைவதன் பாசத்தாலே *
 மற்றவன் பாசங்கள் முற்ற விட்டு *
 கோது இல் புகழ்க் கண்ணன் தன் அடிமேல் *
 வண் குருகூர்ச் சடகோபன் சொன்ன **
 தீது இல் அந்தாதி ஓர் ஆயிரத்துள் *
 இவையும் ஓர் பத்து இசையொடும் வல்லார் *
 ஆதும் ஓர் தீது இலர் ஆகி * அங்கும் இங்கும்
 எல்லாம் அமைவார்கள் தாமே (11)