Thiruvaymozhi — Decade 9, Chapter 1

கொண்ட பெண்டிர் மக்கள் உற்றார் * சுற்றத்தவர் பிறரும் *
 கண்டதோடு பட்டது அல்லால் * காதல் மற்று யாதும் இல்லை **
 எண் திசையும் கீழும் மேலும் * முற்றவும் உண்ட பிரான் *
 தொண்டரோமாய் உய்யல் அல்லால் * இல்லை கண்டீர் துணையே (1)

துணையும் சார்வும் ஆகுவார் போல் * சுற்றத்தவர் பிறரும் *
 அணைய வந்த ஆக்கம் உண்டேல் * அட்டைகள்போல் சுவைப்பர் **
 கணை ஒன்றாலே ஏழ் மரமும் எய்த * எம் கார் முகிலை *
 புணை என்று உய்யப் போகல் அல்லால் * இல்லை கண்டீர் பொருளே (2)

பொருள் கை உண்டாய்ச் செல்லக்காணில் * போற்றி என்று ஏற்று எழுவர் *
 இருள்கொள் துன்பத்து இன்மை காணில் * என்னே என்பாரும் இல்லை **
 மருள்கொள் செய்கை அசுரர் மங்க * வடமதுரைப் பிறந்தாற்கு *
 அருள்கொள் ஆளாய் உய்யல் அல்லால் * இல்லை கண்டீர் அரணே (3)

அரணம் ஆவர் அற்ற காலைக்கு * என்று என்று அமைக்கப்பட்டார் *
 இரணம் கொண்ட தெப்பர் ஆவர் * இன்றியிட்டாலும் அஃதே **
 வருணித்து என்னே * வடமதுரைப் பிறந்தவன் வண் புகழே *
 சரண் என்று உய்யப் போகல் அல்லால் * இல்லை கண்டீர் சதிரே (4)

சதுரம் என்று தம்மைத் தாமே * சம்மதித்து இன்மொழியார் *
 மதுர போகம் துற்றவரே * வைகி மற்று ஒன்று உறுவர் **
 அதிர்கொள் செய்கை அசுரர் மங்க * வடமதுரைப் பிறந்தாற்கு *
 எதிர்கொள் ஆளாய் உய்யல் அல்லால் * இல்லை கண்டீர் இன்பமே (5)

இல்லை கண்டீர் இன்பம் அந்தோ * உள்ளது நினையாதே *
 தொல்லையார்கள் எத்தனைவர் * தோன்றிக் கழிந்தொழிந்தார் **
 மல்லை மூதூர் * வடமதுரைப் பிறந்தவன் வண் புகழே *
 சொல்லி உய்யப் போகல் அல்லால் * மற்றொன்று இல்லை சுருக்கே (6)

மற்றொன்று இல்லை சுருங்கச் சொன்னோம் * மா நிலத்து எவ் உயிர்க்கும் *
 சிற்ற வேண்டா சிந்திப்பே அமையும் * கண்டீர்கள் அந்தோ **
 குற்றம் அன்று எங்கள் பெற்றத் தாயன் * வடமதுரைப் பிறந்தான் *
 குற்றம் இல் சீர் கற்று வைகல் * வாழ்தல் கண்டீர் குணமே (7)

வாழ்தல் கண்டீர் குணம் இது அந்தோ * மாயவன் அடி பரவி *
 போழ்து போக உள்ளகிற்கும் * புன்மை இலாதவர்க்கு **
 வாழ் துணையா * வடமதுரைப் பிறந்தவன் வண் புகழே *
 வீழ் துணையாப் போம் இதனில் * யாதும் இல்லை மிக்கதே (8)

யாதும் இல்லை மிக்கு அதனில் * என்று என்று அது கருதி *
 காது செய்வான் கூதை செய்து * கடைமுறை வாழ்க்கையும் போம் **
 மா துகிலின் கொடிக்கொள் மாட * வடமதுரைப் பிறந்த *
 தாது சேர் தோள் கண்ணன் அல்லால் * இல்லை கண்டீர் சரணே (9)

கண்ணன் அல்லால் இல்லை கண்டீர் * சரண் அது நிற்க வந்து *
 மண்ணின் பாரம் நீக்குதற்கே * வடமதுரைப் பிறந்தான் *
 திண்ணமா நும் உடைமை உண்டேல் * அவன் அடி சேர்த்து உய்ம்மினோ **
 எண்ண வேண்டா நும்மது ஆதும் * அவன் அன்றி மற்று இல்லையே (10)

ஆதும் இல்லை மற்று அவனில் * என்று அதுவே துணிந்து *
 தாது சேர் தோள் கண்ணனை * குருகூர்ச் சடகோபன் சொன்ன **
 தீது இலாத ஒண் தமிழ்கள் * இவை ஆயிரத்துள் இப் பத்தும் *
 ஓத வல்ல பிராக்கள் * நம்மை ஆளுடையார்கள் பண்டே (11)