Thiruvaymozhi — Decade 9, Chapter 5

இன் உயிர்ச் சேவலும் நீரும் கூவிக்கொண்டு * இங்கு எத்தனை *
 என் உயிர் நோவ மிழற்றேல்மின் * குயில் பேடைகாள் **
 என் உயிர்க் கண்ண பிரானை * நீர் வரக் கூவுகிலீர் *
 என் உயிர் கூவிக் கொடுப்பார்க்கும் * இத்தனை வேண்டுமோ? (1)

இத்தனை வேண்டுவது அன்று அந்தோ! * அன்றில் பேடைகாள் *
 எத்தனை நீரும் நும் சேவலும் * கரைந்து ஏங்குதிர்? **
 வித்தகன் கோவிந்தன் * மெய்யன் அல்லன் ஒருவர்க்கும் *
 அத்தனை ஆம் இனி * என் உயிர் அவன் கையதே (2)

அவன் கையதே எனது ஆர் உயிர் * அன்றில் பேடைகாள் *
 எவன் சொல்லி நீர் குடைந்து ஆடுதிர் * புடை சூழவே? **
 தவம் செய்தில்லா * வினையாட்டியேன் உயிர் இங்கு உண்டோ *
 எவன் சொல்லி நிற்றும் * நும் ஏங்கு கூக்குரல் கேட்டுமே? (3)

கூக்குரல் கேட்டும் * நம் கண்ணன் மாயன் வெளிப்படான் *
 மேல் கிளை கொள்ளேன்மின் * நீரும் சேவலும் கோழிகாள் **
 வாக்கும் மனமும் * கருமமும் நமக்கு ஆங்கதே *
 ஆக்கையும் ஆவியும் * அந்தரம் நின்று உழலுமே (4)

அந்தரம் நின்று உழல்கின்ற * யானுடைப் பூவைகாள் *
 நும் திறத்து ஏதும் இடை இல்லை * குழறேல்மினோ **
 இந்திர ஞாலங்கள் காட்டி * இவ் ஏழ் உலகும் கொண்ட *
 நம் திரு மார்பன் * நம் ஆவி உண்ண நன்கு எண்ணினான் (5)

நன்கு எண்ணி நான் வளர்த்த * சிறு கிளிப் பைதலே *
 இன் குரல் நீ மிழற்றேல்! * என் ஆர் உயிர்க் காகுத்தன் **
 நின் செய்ய வாய் ஒக்கும் வாயன் * கண்ணன் கை காலினன் *
 நின் பசும் சாம நிறத்தன் * கூட்டுண்டு நீங்கினான் (6)

கூட்டுண்டு நீங்கிய * கோலத் தாமரைக் கண் செவ்வாய் *
 வாட்டம் இல் என் கருமாணிக்கம் * கண்ணன் மாயன்போல் **
 கோட்டிய வில்லொடு * மின்னும் மேகக் குழாங்கள்காள் *
 காட்டேல்மின் நும் உரு * என் உயிர்க்கு அது காலனே (7)

உயிர்க்கு அது காலன் என்று * உம்மை யான் இரந்தேற்கு * நீர்
 குயில் பைதல்காள் * கண்ணன் நாமமே குழறிக் கொன்றீர் **
 தயிர்ப் பழஞ் சோற்றொடு * பால் அடிசிலும் தந்து * சொல்
 பயிற்றிய நல் வளம் ஊட்டினீர்! * பண்பு உடையீரே (8)

பண்பு உடை வண்டொடு தும்பிகாள் * பண் மிழற்றேல்மின் *
 புண் புரை வேல் கொடு ** குத்தால் ஒக்கும் நும் இன் குரல்
 தண் பெரு நீர்த் தடம் தாமரை * மலர்ந்தால் ஒக்கும்
 கண் பெரும் கண்ணன் * நம் ஆவி உண்டு எழ நண்ணினான் (9)

எழ நண்ணி நாமும் * நம் வான நாடனோடு ஒன்றினோம் *
 பழன நல் நாரைக் குழாங்கள்காள் * பயின்று என் இனி? **
 இழை நல்ல ஆக்கையும் * பையவே புயக்கு அற்றது *
 தழை நல்ல இன்பம் தலைப்பெய்து * எங்கும் தழைக்கவே (10)

இன்பம் தலைப்பெய்து எங்கும் தழைத்த * பல் ஊழிக்கு *
 தன் புகழ் ஏத்தத் * தனக்கு அருள் செய்த மாயனை **
 தென் குருகூர்ச் சடகோபன் * சொல் ஆயிரத்துள் இவை *
 ஒன்பதோடு ஒன்றுக்கும் * மூவுலகும் உருகுமே (11)