Thiruviruththam Pasurams 21–30

சூட்டு நல் மாலைகள் * தூயன ஏந்தி * விண்ணோர்கள் நல் நீர்
 ஆட்டி அம் தூபம் தராநிற்கவே அங்கு ** ஓர் மாயையினால்
 ஈட்டிய வெண்ணெய் தொடு உண்ணப் போந்து இமில் ஏற்று வன் கூன் *
 கோட்டிடை ஆடினை கூத்து * அடல் ஆயர் தம் கொம்பினுக்கே21

கொம்பு ஆர் தழை கை சிறு நாண் எறிவு இலம் * வேட்டை கொண்டாட்டு
 அம்பு ஆர் களிறு வினவுவது ஐயர் ** புள் ஊரும் கள்வர்
 தம் பாரகத்து என்றும் ஆடாதன தம்மில் கூடாதன
 வம்பு ஆர் வினாச் சொல்லவோ * எம்மை வைத்தது இவ் வான் புனத்தே?22

புனமோ? புனத்து அயலே வழிபோகும் அரு வினையேன் *
 மனமோ? மகளிர் நும் காவல் சொல்லீர் ** புண்டரீகத்து அம் கேழ்
 வனம் ஓர் அனைய கண்ணான் கண்ணன் வான் நாடு அமரும் * தெய்வத்து
 இனம் ஓர் அனையீர்களாய் * இவையோ நும் இயல்வுகளே?23

இயல்வாயின வஞ்ச நோய் கொண்டு உலாவும் * ஒரோ குடங்கைக்
 கயல் பாய்வன * பெரு நீர்க் கண்கள் தம்மொடும் ** குன்றம் ஒன்றால்
 புயல்வாய் இன நிரை காத்த புள் ஊர்தி கள் ஊரும் துழாய்க் *
 கொயல்வாய் மலர்மேல் * மனத்தொடு என்னாம்கொல் எம் கோல் வளைக்கே?24

எம் கோல் வளை முதலா * கண்ணன் மண்ணும் விண்ணும் அளிக்கும் *
 செங்கோல் வளைவு விளைவிக்குமால் ** திறல் சேர் அமரர்
 தம் கோனுடைய தம் கோன் உம்பர் எல்லா எவர்க்கும் தம் கோன் *
 நம் கோன் உகக்கும் துழாய் * என் செய்யாது இனி நானிலத்தே?25

நானிலம் வாய்க் கொண்டு * நல் நீர் அற மென்று கோது கொண்ட *
 வேனில் அலம் செல்வன் சுவைத்து உமிழ் பாலை ** கடந்த பொன்னே
 கால் நிலம் தோய்ந்து விண்ணோர் தொழும் கண்ணன் வெஃகாஉது * அம் பூந்
 தேன் இளஞ் சோலை அப்பாலது * எப்பாலைக்கும் சேமத்ததே26

சேமம் செங்கோன் அருளே * செறுவாரும் நட்பு ஆகுவர் என்று
 ஏமம் பெற வையம் * சொல்லும் மெய்யே ** பண்டு எல்லாம் அறை கூய்
 யாமங்கள் தோறு எரி வீசும் நம் கண்ணன் அம் தண்ணம் துழாய்த் *
 தாமம் புனைய * அவ் வாடை ஈதோ வந்து தண்ணென்றதே27

தண் அம் துழாய் * வளை கொள்வது யாம் இழப்போம் * நடுவே
 வண்ணம் துழாவி * ஓர் வாடை உலாவும் ** வள் வாய் அலகால்
 புள் நந்து உழாமே பொரு நீர்த் திருவரங்கா * அருளாய் *
 எண்ணம் துழாவுமிடத்து * உளவோ பண்டும் இன்னன்னவே?28

இன்னன்ன தூது எம்மை ஆள் அற்றப்பட்டு இரந்தாள் இவள் என்று *
 அன்னன்ன சொல்லா பெடையொடும் போய்வரும் ** நீலம் உண்ட
 மின் அன்ன மேனிப் பெருமான் உலகில் பெண் தூது செல்லா *
 அன்னன்ன நீர்மைகொலோ? * குடிச் சீர்மை இல் அன்னங்களே29

அன்னம் செல்வீரும் வண்டானம் செல்வீரும் தொழுது இரந்தேன் *
 முன்னம் செல்வீர்கள் * மறவேல்மினோ ** கண்ணன் வைகுந்தனோடு
 என் நெஞ்சினாரைக் கண்டால் என்னைச் சொல்லி * அவரிடை நீர்
 இன்னம் செல்லீரோ? * இதுவோ தகவு? என்று இசைமின்களே30